Pavlodarda onkologııalyq dıspanser salynady
ASTANA. QazAqparat - Pavlodarda onkologııalyq dıspanser salynady. Bul týraly búgin Ortalyq kommýnıkatsııalar qyzmetindegi brıfıngte Pavlodar oblysynyń ákimi Bolat Baqaýov málim etti, dep habarlaıdy QazAqparat.
«Bıýdjet qarajaty esebinen Pavlodarda 200 tósek-orynǵa arnalǵan oblystyq onkologııalyq dıspanser men bir aýysymda 100 adamdyq qabyldaıtyn emhananyń qurylysyn bastadyq. Atalǵan nysandardy paıdalanýǵa berý densaýlyq saqtaý kórsetkishin arttyryp, onkologııalyq aýrýlardyń tómendeýine septigin tıgizedi», - dedi ol.
Sonymen qatar Bolat Baqaýov óńirdegi kásiporyndardy jańǵyrtý barysyndaǵy mindetti sharttardyń biri ekologııalyq júktemelerdi tómendetý máselesi bolyp otyrǵandyǵyn basa aıtty.
«Tek osy jyldyń ózinde ǵana kásiporyndar júrgizgen ekologııalyq sharalarǵa 12 mlrd teńge jumsaldy. Nátıjesinde sońǵy 2 jylda atmosferaǵa shyǵaryndylardyń kólemi 11 paıyzǵa tómendedi», - dedi oblys basshysy.
Aıta keterligi, ákimdik usynǵan málimetterge qaraǵanda, oblystyq densaýlyq saqtaý salasynda 350 medıtsınalyq uıym bar. Olarda 2370 dáriger jáne 6269 orta býyn medıtsına qyzmetkeri jumys isteıdi. 2017 jyldyń qańtar-maýsym aralyǵynda oblysta 8070 bala dúnıege kelgen.
