Pavlodarda ońaltý mekemesiniń nusqaýshysy múgedektigi bar qyzǵa qol jumsaǵany úshin sottaldy
PAVLODAR. KAZINFORM - Ekibastuz qalasyndaǵy ońaltý ortalyǵynda nusqaýshy bolyp jumys istegen jas jigit kámeletke tolmaǵan balany tárbıeleý jónindegi mindetterin tıisinshe oryndamaǵany úshin kináli dep tanyldy.
Oqıǵa 2025 jyldyń qazan aıynda Ekibastuz qalasyndaǵy ońaltý ortalyǵynda bolǵan. Samal Nurasheva múgedektigi bar balany tárbıelep otyr. Sabaqtardyń birinen keıin ol qyzynyń qoly aýyratynyna nazar aýdarǵan. Keıin áıel áleýmettik jelilerde shaǵymyn jáne beınebaqylaý kameralarynan túsirilgen jazbalardy jarııalady. Beınejazbada beıimdelgen dene shynyqtyrý nusqaýshysynyń balaǵa dóreki qarym-qatynas jasaǵany kórinedi.
Atalǵan derek boıynsha qylmystyq is qozǵalyp, keıin sotqa jetti. Sot otyrysy barysynda kýálar men jábirlenýshi taraptyń jaýaptary, saraptamalardyń qorytyndylary jáne beınebaqylaý kameralarynyń jazbalary zertteldi.
- Bala onsyz da aýyrady, onyń tolyqqandy baqytty balalyq shaǵy joq. Osyndaı qarym-qatynas jasaýǵa ne sebep bolǵanyn áli kúnge deıin túsinbeımin. Bir jylǵa jýyq ýaqyt boıy biz belgisiz jaǵdaıda ómir súrip kelemiz. Bul oqıǵaǵa deıin jaqsy nátıje kórsetip, jaǵdaıy jaqsaryp kele jatqan qyzymnyń damýynda keri ketý tirkeldi, — dedi sot jaryssózinde qyzdyń anasy Samal Nurasheva.
Aıyptalýshy 19 jastaǵy er azamat. Sotta ol ońaltý ortalyǵynda taǵylymdamadan ótkenin aıtyp, ózine taǵylǵan aıypty moıyndamady. Sonymen qatar ol qyzdyń anasynan keshirim surady.
Prokýror sottalýshyǵa bas bostandyǵyn shekteý jazasyn taǵaıyndap, keıin raqymshylyq jasaý týraly ótinish bildirdi. Sot onyń kinási dáleldendi degen qorytyndyǵa keldi.
- QR Qylmystyq kodeksiniń 140-baby 2-bóliginde kózdelgen qylmystyq quqyq buzýshylyqty jasaǵany úshin kináli dep tanylsyn jáne oǵan bir jyl merzimge bas bostandyǵyn shekteý jazasy taǵaıyndalsyn. Sonymen qatar úsh jyl merzimge pedagogıkalyq laýazymdardy jáne kámeletke tolmaǵandarmen jumys isteýge baılanysty laýazymdardy atqarý quqyǵynan aıyrylsyn, - degen úkim shyǵardy Pavlodar oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń sýdıasy Juldyz Kamalova.
Sot jańa Konstıtýtsııanyń qabyldanýyna baılanysty raqymshylyq jasaý týraly zańdy qoldanyp, jas jigitti jazadan bosatty. Sonymen birge sot ony materıaldyq jáne moraldyq zııandy óteýge mindettedi. Ótemaqynyń jalpy somasy 1 mln 850 myń teńgeni qurady.
Eske sala keteıik, Mańǵystaýda bir top jasóspirim qyzdy uryp, oqıǵany vıdeoǵa túsirgen.
