Pavlodarda on úıdiń turǵyndary jylýǵa mıllıondap aqsha jumsasa da, pesh jaǵýǵa májbúr
PAVLODAR. KAZINFORM - Pavlodar qalasyndaǵy MDS shaǵyn aýdanynyń turǵyndary úılerin ortalyq jylýǵa qosý úshin mıllıondaǵan teńge jumsaǵan. Alaıda qaladaǵy jylý qýatynyń tapshylyǵyna baılanysty aýmaq «qyzyl» aımaqqa engizilip, turǵyndar áli kúnge deıin pesh jaǵýǵa májbúr.
MDS shaǵyn aýdany Nazarbaev, Amangeldi, Kataev jáne Krasnodonskaıa kósheleriniń aralyǵyndaǵy jeke úılerdi qamtıdy. 2021 jyly merdiger kompanııa óz qarajaty esebinen ortalyq jylý kommýnıkatsııalaryn tartqan. 300 úıge arnalǵan jobany ázirlep, «Pavlodar jylý jelileri» JShS-men kelisken. Turǵyndarǵa úılerine deıin qubyr tartyp, qajetti jabdyqtardy ornatý mindeti júktelgen.
Qurylys kompanııasy dırektorynyń orynbasary Dmıtrıı Teslanyń aıtýynsha, alǵashqy jyly 34 úı, kelesi jyly taǵy 10 úı ortalyq jylýǵa qosylǵan. 2022 jyldyń sońynda taǵy 10 úıge kommýnıkatsııalar tartylǵan. Alaıda 2023 jylǵy qańtarda nysandardy paıdalanýǵa berý kezinde qosylýǵa shekteý qoıylǵan.
Pavlodarlyq Dmıtrıı Tolmachev úıine qubyr tartý jáne jylý torabyn ornatý úshin shamamen 4 mıllıon teńge jumsaǵan. Qazir ol qymbat jabdyqtyń turǵanyna qaramastan, kómir men otyn satyp alyp, pesh jaǵýǵa májbúr. Onyń aıtýynsha, úılerge tartylǵan qubyrlar negizgi jylý trassasynan ajyratylǵan.
— Bizdi tolyq qosyp qoıǵan, barlyq jumys oryndaldy. Qazir krandy ashyp, jylýdy paıdalana alamyz. Bizge tek ruqsat qujattary kerek. Osy 10 úıdiń máselesin jeke qarastyrýdy suraımyz. Qajet bolsa, aýdıt júrgizip, jylýdyń jetkilikti ekenin tekserýge daıynbyz, — deıdi Shymkent kóshesi, 64-úıdiń turǵyny.
«Pavlodar jylý jelileri» JShS-nyń málimetinshe, turǵyndarǵa tehnıkalyq sharttardyń berilgenine eki jyl ótken. Osy ýaqytta olar jobany bekitip, jylý jelisi men torabyn ornatyp, qujattaryn ázirlep, júıege qosylýǵa tıis edi.
— Eger nysandar belgilengen merzimde qosylmasa jáne rásim resmı aıaqtalmasa, tehnıkalyq sharttar kúshin joıady. 2023 jylǵy qańtarda jylý qýatynyń tapshylyǵyna baılanysty aýdan «qyzyl» aımaqqa aýystyryldy. Qazir mundaı aýmaqtarda jańa tehnıkalyq sharttar berý nemese nysandardy qosý múmkin emes, - dep jaýap berdi kompanııa.
Turǵyndar nebári 10 úıdiń jylý júıesine qosylýy qalanyń jylý júıesine edáýir júkteme túsiretinine kúmánmen qaraıdy. Sondaı-aq jaqyn mańda jańadan kópqabatty úıler salynyp, olarǵa jylýǵa qosylýǵa ruqsat berilip jatqanyn aıtady.
Olar bul máseleni jeke qarastyryp, ornatylǵan jabdyqtardy paıdalanýǵa múmkindik berýdi surap otyr.
Buǵan deıin Petropavl qysta jylýsyz qalmaýy úshin ne isteldgenin jazǵanbyz.
