Pavlodarda on qabatty úıde birneshe páter órtenip, 49 adam evakýatsııalandy
PAVLODAR. QazAqparat – Pavlodar qalasynda páterleri órtenip jatqan úıde turatyn áıel medıtsınalyq kómekke júgindi, dep habarlaıdy QazAqparat.
«11 mamyr kúni saǵat 02.57-de Pavlodar qalasynyń Sıbırskaıa, 85 mekenjaıynda ornalasqan on qabatty turǵyn úıdiń besinshi qabatyndaǵy bir bólmeli úıden órt shyqqany týraly habarlama kelip tústi. Anyqtalǵandaı, sol páterdiń balkonyndaǵy úı zattary, terezeniń aǵash jaqtaýy, al bólmesinde – úı zattary men jıhaz órtenip jatqan. Іrgeles jatqan úsh bólmeli páterdiń balkonyndaǵy aǵash jaqtaý kúıgen» dep habarlady tilshilerge Pavlodar oblystyq tótenshe jaǵdaılar departamentiniń baspasóz qyzmeti.
Departament málimetinshe, odan joǵary ornalasqan altynshy qabattaǵy eki páter terezeleriniń aǵash jaqtaýlary men úı zattary órtengen.
Órttiń jalpy aýdany - 11,5 sharshy metr. Órt sóndirýshiler kelgenshe bul kireberisten 49 adam, sonyń ishinde 11 bala óz betinshe evakýatsııalandy.
«Apattar medıtsınasy qyzmetine demikpe dıagnozymen 1967 jyly týǵan áıel kelip, kómek suraǵan. Oǵan alǵashqy medıtsınalyq kómek kórsetildi», - dep qosyp ótti departamentten.
Órt saǵat 03.37-de sóndirildi. Oqıǵanyń sebebi men kelgen shyǵyn anyqtalyp jatyr.
Oqıǵa ornyna TJ departamenti jeke quramynyń 26 qyzmetkeri men jeti tehnıka, apattar medıtsınasy ortalyǵy, 102 qyzmetkerleri shyqqan.
Qaza tapqandar men zardap shekkender joq.
