Pavlodarda Oljas Toqtarovtyń tárkilengen syra zaýyty bastapqy qunynan 10 ese arzanǵa satyldy
PAVLODAR. KAZINFORM - Bastapqy quny 19 mlrd teńge bolǵan syra, mıneraldy sý jáne túrli sýsyndar óndiretin zaýyt aýktsıonda baǵany tómendetý ádisimen satylǵan.
Pavlodar oblystyq memlekettik múlik jáne jekeshelendirý departamentiniń málimetinshe, jańa menshik ıesine qaıta tirkeý protsedýrasy belgili bir ýaqytty alady. Bul rette saýda-sattyqqa tek jyljymaıtyn múlik, ıaǵnı Pavlodar men Ekibastuz qalalaryndaǵy ǵımarattar shyǵarylǵan. Óndiris júrip jatqan qural-jabdyqtar týraly sóz bolǵan joq.
- Baǵalaý quny 6,4 mlrd teńgeni qurady. Satý somasy múlik qunynyń 30%-yna deıin tómendetildi. Bul – 1 mlrd 966 mln teńge. Satyp alýshy týraly aqparat qupııa. Eger satyp alǵan kásipkerdiń ózi ol týraly aıtqanymyzdy qalasa, biz málimet beremiz. Ázirshe odan eshqandaı aqparat túsken joq. Ol baılanysqa shyqqan joq, barlyǵy portal arqyly onlaın ótip jatyr, - dedi Pavlodar oblystyq memlekettik múlik jáne jekeshelendirý departamentiniń bólim basshysy Ermuhamed Ábish.
Erejege sáıkes, sheneýnikter múlik keshenin ýaqytsha esepke alǵan kezde onyń esigine mór basyp, jaýyp tastaýy kerek edi. Deıturǵanmen kelisim boıynsha kásiporyn jumysy toqtatylǵan joq, sýsyn óndirisi jalǵasa berdi. Bul ujymdaǵy 350-ge jýyq adamdy jumyssyz qaldyrmaý úshin jasalǵan qadam bolatyn.
- Biz múlikterdi 2026 jyldyń qańtarynda qabyldap aldyq. Ýaqytsha esepke qoıdyq, biraq múlik burynǵy ıesiniń menshiginde qalyp otyr. Sot úkimine sáıkes ony baǵalaýdy jáne satýdy júzege asyramyz. Bizdiń mundaı ókilettigimiz bar. Satylymnan keıin kelisimshart, hattama, sot sheshimin beremiz. Jańa satyp alýshy olardyń negizinde qaıta tirkeý protsedýrasyn júrgizedi, - dep tolyqtyrdy Ermuhamed Ábish.
Buǵan deıin Pavlodarda Oljas Toqtarovtyń tárkilengen syra zaýyty aýktsıonǵa shyǵarylǵanyn jazǵan bolatynbyz.
