Pavlodarda Oljas Toqtarovtyń tárkilengen syra zaýyty aýktsıonǵa shyǵaryldy
PAVLODAR. KAZINFORM - Astana bankiniń burynǵy aktsıoneri Oljas Toqtarovqa tıesili bolǵan «Jańa Rosa» syra zaýytynyń múliktik kesheni aýktsıonǵa qoıyldy. Tárkilengen lottyń bastapqy baǵasy 19,3 mlrd teńgeni qurap otyr.
Múliktik keshen zańsyz aktıvterdi jymqyrý aıybymen 10 jylǵa bas bostandyǵynan aıyrylǵan Oljas Toqtarovtyń isi boıynsha memleket paıdasyna tárkilengen bolatyn. Pavlodar jáne Ekibastuz qalalarynda ornalasqan óndiristik ǵımarattar men jabdyqtardyń jıyntyq bastapqy baǵasy - 19,3 mlrd teńge.
Aýktsıon 14 tamyz kúni saǵat 10.00-de baǵany tómendetý ádisimen ótkiziletini kórsetilgen. Satýshy - QR Qarjy mınıstrligi Memlekettik múlik jáne jekeshelendirý komıtetiniń Pavlodar memlekettik múlik jáne jekeshelendirý departamenti.
Saýda-sattyqqa usynylǵan nysandar qatarynda:
- Aýdany 8,6 myń sharshy metrden asatyn ákimshilik ǵımarat;
- Jalpy aýdany 9 myń sharshy metrden asatyn óndiristik tsehtar;
- Daıyn ónim, shıkizat pen ydystarǵa arnalǵan 6 iri qoıma;
- Kazandyq, zerthana, avtotarazy, garajdar jáne ózge de ınfraqurylymdar;
- Pavlodar qalasyndaǵy jalpy aýmaǵy 5,8 gektardy quraıtyn 8 jer ýchaskesi;
- Ekibastuz qalasynda ornalasqan jyljymaıtyn múlik nysany bar.
2026 jyldyń sáýir aıynda júrgizilgen baǵalaý qorytyndysy boıynsha zaýyttyń naryqtyq quny 6,4 mlrd teńge kóleminde belgilengen.
Eske sala keteıik, 2024 jylǵy qyrkúıek aıynda Antıkor Astana bankiniń burynǵy aktsıoneri Oljas Toqtarovty jaýap alýǵa shaqyrǵan bolatyn.
Alǵashqyda Oljas Toqtarovqa jáne ózge de tulǵalarǵa qatysty bank aktıvterin jalǵan agenttik qyzmetter kórsetý jáne baqylaýyndaǵy «SKK Tennasy Group» JShS paıdasyna Almaty qalasy Qobdolov k-si 22 «B» bıznes-ortalyq ǵımaratyn zańsyz ıelikten shyǵarý arqyly asa iri mólsherde jymqyrý faktisi boıynsha qylmystyq is tergeldi.
Al 2025 jyldyń sáýir aıynda Astana bankiniń burynǵy aktsıoneri Oljas Toqtarovqa syrttaı sot úkimi shyqty.
Sot materıaldaryna súıensek, 2015 jyly Oljas Toqtarovtyń bastamasymen Pavlodar syra zaýytyn ATF Bankten satyp alý úshin «Jańa Rosa» JShS qurylǵan. 2016 jyly atalǵan kásiporyn Astana bankinen 1,8 mıllıard teńge kóleminde qaryz alǵan.
QR Qarjy naryǵyn retteý jáne damytý agenttiginiń tekserisi bul nesıeniń banktiń nesıelik saıasatyn óreskel buza otyryp berilgenin anyqtady. Máselen, kompanııanyń jumys istep turǵanyna bir jyl tolmaǵan, kepilzaty bolmaǵan, al qarjylyq kórsetkishteri shyǵyndy kórsetip turǵan. Sot sheshimine sáıkes, O. Toqtarov Banktiń Dırektorlar keńesin basqara otyryp, osy nesıelik qarajat arqyly úlestes tulǵalar men jaqyndarynyń atyna zaýytty zańsyz satyp alǵan.
Tergeý barysynda kásiporyndy O. Toqtarovtyń ózi basqarǵany, al resmı quryltaıshylary men basshylary retinde onyń jaqyn týystary men burynǵy bank qyzmetkerleri tirkelgeni dáleldendi.
Nátıjesinde, sot úkimimen zaýyt múlki tolyǵymen memleket menshigine tárkilengen bolatyn.
