Pavlodarda oqýshynyń basyna túsken súńgi úshin PIK jaýapqa tartyldy
PAVLODAR. QazAqparat - Pavlodarda jasóspirimniń basyna shatyrdan qulaǵan muz kesegi úshin Páter ıeleri kooperatıvi (PIK) aıyppul tóleıtin boldy, dep habarlaıdy QazAqparat.
Oqıǵa 6 naýryz kúni boldy. 16 jastaǵy jasóspirim bes qabatty úıge kirip bara jatqanda basyna jarty metrlik súńgi túsken. Oblystyq Densaýlyq saqtaý basqarmasynan málim etkendeı, bala bassúıek-mı jaraqatynyń jabyq túri, bas mıynyń shaıqalýy, tóbe súıeginiń zaqymdanýy dıagnozdarymen oblystyq balalar aýrýhanasyna jetkizilgen.
«Atalǵan fakti tirkeldi. Kámelettik jasqa tolmaǵan bala Korolenko kóshesi, 355-úıdiń podezi janynda shatyrdan muzdyń qulaýyna baılanysty bas jaraqatyn alǵany anyqtaldy», - dep jazdy Polıtsııa departamentine silteme jasap pavlodarnews.kz.
Vedomstvo aqparatyna sáıkes, PIK dırektory QR Ákimshilik quqyqbuzýshylyq týraly kodekstiń 505-baby boıynsha jaýapkershilikke tartyldy. Oǵan 30 AEK mólsherinde aıyppul taǵaıyndaldy.
QR turǵyn úı qatynastary týraly zańnyń 43-baby, 8-tarmaǵy boıynsha kez kelgen PIK, JShS qyzmet kórsetetin turǵyn úıdiń sanıtarlyq jáne tehnıkalyq jaǵdaıyna jaýapty.
