Pavlodarda oqýshylardy qaqqan tramvaı júrgizýshisiniń soty bastaldy
PAVLODAR. QazAqparat - Pavlodardyń №2 sotynda 7 qyrkúıek kúni apaly-sińli mektep oqýshylaryn qaǵyp ketken 30 jastaǵy Natalıa Peknıchtiń isine qatysty sot talqylaýy ótip jatyr. Ol QR QK-iniń 345-baby 3-bóligi boıynsha aıyptalýda.
Jábirlenýshi tarap buǵan deıin materıaldyq shyǵyn ótelýin talap etpegenin málim etti, al qazir 18 qarashadaǵy shaǵymynda balalardyń anasy Shynar Ýalıtova talap aryzben endi ǵana tanysyp jatqanyn jazǵan. Moraldyq shyǵyn «óndirgisi keletinin» aýyzsha aıtty, dedi onyń ókili.
Sot protsesin Dýman Serikbaev júrgizýde. Shynar Ýalıtovanyń ózi sot otyrysyna kelmegen. Sot protsesi qysqartylǵan tártipte ótti. Kelesi sot otyrysynda jábirlenýshi taraptyń ustanymdaryn anyqtaý kerek.
Kóziniń jasyn tyıa almaǵan Natalıa Peknıch ázer túsinik berdi.
N.Peknıch saǵatyna shamamen 20-23 kılometr jyldamdyqpen júrgen. «Barlyq eski vagondardyń spıdometri istemeıdi. Jyldamdyq ólsheýishtiń istemeıtinin men eshkimge habarlaǵan joqpyn», - dedi ol. Júrgizýshi tramvaı deposynda eski tramvaıdardyń isten shyqqanyn bári biletinin, alaıda ol bul jaıly basshylyǵyna eshqashan habarlamaǵanyn jetkizdi. Sondaı-aq, onyń qorǵaýshysy qozǵalys qaýipsizdigin qamtamasyz etý úshin júrgizýshige jaýyn men joldar arasyndaǵy bólgish qorshaýlar kedergi keltirgenin málim etti.
Kelesi sot otyrysy 30 qarashaǵa belgilendi.
Aıta keteıik, 2017 jyldyń qyrkúıek aıynda 2007 jáne 2009 jylǵy apaly-sińli eki qyzdy tramvaı qaǵyp ketken bolatyn. Úlkeni kóz jumyp, kishisi aýrýhanaǵa jetkizilgen. Tramvaı júrgizýshisi 1987 jylǵy. Eńbek ótili - 5 jyl.
