Pavlodarda oqýshy qyzdardy qaǵyp ketken tramvaı júrgizýshisi 2 aıǵa qamaýǵa alyndy
PAVLODAR. QazAqparat - Pavlodar qalasynyń №2 qylmystyq soty apaly-sińlili eki oqýshy qyzdy qaǵyp ketken tramvaı júrgizýshisin qamaýǵa alý jóninde sheshim shyǵardy, dep habar beredi «QazAqparat» HAA tilshisi.
«Sot «kólik quralyn basqarýshy tulǵanyń abaısyzda adam ólimine ákep soqtyrǵan jol qozǵalysy erejelerin buzýy» baby boıynsha qylmystyq quqyqbuzýshylyq jasaýda aıyptalýshyǵa qatysty jaza qoldaný sharalaryn tańdaý týraly materıaldardy qarap shyqty, - dep málimdedi sýdıa Áset Súleımenov. - Sottyń sheshimimen tramvaı júrgizýshisine eki aıǵa qamaýǵa alý túrindegi jaza belgilendi».
30 jastaǵy júrgizýshi qamaýdan 8 qarashada shyǵady. Sotta jas kelinshektiń alty jastaǵy qyzy bar ekeni aıtyldy. Polıtsııa qyzmetkerleriniń aıtýynsha, sotqa deıingi tergeý amaldary áli jalǵasýda. Qamaýǵa alý ótinishin polıtsııa bildirgen, ony prokýror qoldaǵan.
Búgingi tańda tramvaı qaǵyp ketýiniń saldarynan qaza bolǵan on jasar Mahabbat Masǵutty jerleý rásimi ótti. Onyń denesimen ata-anasy, synyptastary, dostary, jaqyndary qoshtasty.
