Pavlodarda oqýshyny úshkir zatpen túırep ótken muǵalim kinásiz dep tanyldy

PAVLODAR. KAZINFORM - Polıtsııa sotqa deıingi óndiristi toqtatyp, oqýshyny arqasynan ótkir zatpen túıregen ustaz dene jaraqatyn salmaǵan degen qorytyndy jasady.

Bıylǵy qańtar aıynda Pavlodar qalasynda taqta aldyna shyqqan oqýshyny matematıka muǵalimi arqasynan úshkir zatpen (burandaly shegemen) túırep ketkeni týraly oqıǵa áleýmettik jeli qoldanýshylaryn shýlatqan edi.

- Atalǵan oqıǵa boıynsha sotqa deıingi tergeý sharalary aıaqtalyp, is toqtatyldy. Materıaldar óndirisinde bul istiń quramynda qylmystyq zańbuzýshylyqtyń joq ekeni anyqtaldy. Kámeletke tolmaǵan er balaǵa dene jaraqatyn keltirýdiń qandaı da bir derekteri anyqtalmaǵany sot-medıtsınalyq saraptamanyń qorytyndysymen, kámeletke tolmaǵandy kýálandyrýdy júrgizgen sarapshynyń jaýap alý hattamasymen jáne kabınetten túsirilgen beınejazba arqyly rastaldy,-dep habarlady óńirlik polıtsııa departamentiniń baspasóz qyzmetinen.

Eske sala keteıik, oqıǵa qańtar aıynda, Pavlodardaǵy №26 mekteptiń 9 D synybynda algebra sabaǵy júrip jatqanda bolǵan.

Matematıka pániniń muǵalimi taqtaǵa shyǵyp, tapsyrmany sheship turǵan er balanyń artynan kelip, áldenemen túırep ótedi. Beınejazbadan oqýshynyń aýyrsynyp qalǵany baıqalady ári onyń aldynda muǵalimniń shkafqa jaqyndap kelip, odan burandaly shegeni (shýrýp) bosatyp alǵany da kameraǵa túsip qalǵan.

Polıtsııa qylmystyq is qozǵap, mektep ákimshiligi atalǵan muǵalimmen eńbek shartyn buzyp, jumystan shyǵaryp jibergen edi.

Áleýmettik jeli qoldanýshylary mektep basshylyǵynyń sheshimi durys emes degen baılam jasady. Al mektep ata-analary ustazdy qoldaý úshin qol jınamaq boldy.

Aqyr-sońy pedagog oqýshynyń ata-anasynan keshirim surap, arada eki kún ótkende jumysqa qaıtadan alyndy.

Osyǵan deıin Pavlodar oblysynda shybyn-shirkeıdi ýlaý jumystaryna daıyndyq bastalǵany týraly jazdyq.