Pavlodarda oqýshyny úshkir zatpen túırep ótken muǵalim qylmystyq jaýapkershilikke tartylady

PAVLODAR. KAZINFORM -  Pavlodar qalasynda taqta aldyna shyqqan oqýshyny matematıka muǵalimi arqasynan úshkir zatpen túırep ketken. Bul jaıt beınekameraǵa túsip qalǵan.

Qalalyq bilim berý bóliminen habarlaǵandaı, №26 mekteptiń 9 D synybynda algebra sabaǵy júrip jatqan. Osy sátte matematıka pániniń muǵalimi taqtaǵa shyǵyp, tapsyrmany sheship turǵan er balanyń artynan kelip, áldenemen túırep ótedi.

Beınejazbadan oqýshynyń aýyrsynyp qalǵany baıqalady ári onyń aldynda muǵalimniń shkafqa jaqyndap kelip, odan burandaly shegeni (shýrýp) bosatyp alǵany da kameraǵa túsip qalǵan.

- Er balany mekteptegi medıtsına qyzmetkeri, jedel járdem brıgadasy qarap shyǵyp, denesindegi teri qabaty búlinbegenin anyqtady. Ata-anasyna balasyn oblystyq balalar aýrýhanasyna alyp baryp, sirespege qarsy ekpe alý usynylǵan. Alaıda olar jeke klınıkaǵa qaralatyndaryn aıtyp, bas tartty. Al pedagog óziniń nege bulaı jasaǵanyn túsindire almaı otyr. Ata-anasynan keshirim surady, - dep habarlady bilim berý bóliminen.

Atap óterligi, oqýshynyń týystary balany ınemen túıregen deıdi. Al muǵalim burandaly shegeni qoldanǵanyn aıtady.

Mektep ákimshiligi bul oqıǵadan soń atalǵan muǵalimmen eńbek shartyn buzyp, jumystan shyǵaryp jibergen.

Al óńirlik polıtsııa departamenti kámeletke tolmaǵan adamdy uryp-soǵý nemese ózge de kúsh qoldaný áreketteri deregi boıynsha pedagogke qatysty qylmystyq is qozǵalǵanyn málimdedi. Oqıǵanyń mán-jaıy men sebepteri anyqtalyp jatyr.

Buǵan deıin jelide ózimen shamalas qyzdy aıaýsyz urǵan boıjetkenniń vıdeosy tarap ketkeni týraly jazǵan edik. Qyzdardyń Pavlodardaǵy kollejderdiń birinde oqıtyny málim boldy.