Pavlodarda oqýshyǵa esirtki berip, zorlaǵan er adamǵa úkim shyǵaryldy

PAVLODAR. KAZINFORM — Іs materıaldaryna súıensek, 30 jastaǵy er adam qyz balany psıhotroptyq zat qoldanýǵa kóndirip, sońynan ony zorlaǵan. Bul ýaqytta ol jergilikti fýtbol ortalyǵynda menedjer bolyp qyzmet etken.

Belgili bolǵandaı, 2024 jylǵy 1 qyrkúıek kúni aıyptalýshy qyzdy alyp qonaqúıge barǵan. Qyzdy óziniń týysy dep tanystyrǵan. Іs materıaldarynda qonaqúı nómirine ornalasqan soń fýtbol menedjeri mefedron (sıntetıkalyq esirkti) alyp shyǵyp, untaqty qyzdyń murnyna sepkeni aıtylady.

— Er adam untaqty qaǵazǵa orap, qyzdyń basyn sál shalqaıtyp murnyna sepken. Balanyń jaǵdaıy sol sátte nasharlap ketken. Bul suraqtardy bir zerttedik jáne sarapshylardan suradyq. Álgi zatty aıyptalýshy da tutynǵan, — deıdi Pavlodar oblysy qylmystyq ister jónindegi mamandandyrylǵan aýdanaralyq sotynyń sýdıasy Qudabaı Sultanov.

Esirtki tutynǵan soń 30 jastaǵy azamat qyzǵa seksýaldyq sıpattaǵy zorlyq-zombylyq áreketin jasaǵan. Sotta aıyptalýshy «sol sátte mas boldym, atalǵan jaǵdaı esimde joq» dep aqtalǵan.

Sot isti kámeletke tolmaǵan adamdy kúsh qoldaný arqyly psıhotroptyq zattardyń tektesterin tutynýǵa kóndirý (QR Qylmystyq kodeksiniń 299-baby. 3-bólim. 1), 2) tarmaqtary) jáne jas balaǵa qatysty seksýaldyq sıpattaǵy zorlyq-zombylyq áreketterin jasaý (QR Qylmystyq kodeksiniń 121-baby. 4-bólim) boıynsha qarady. 
Sottalýshynyń kinási jábirlenýshiniń, onyń zańdy ókiliniń, kýálerdiń aıǵaqtarymen, sot saraptamalarynyń qorytyndylarymen jáne sotta zerttelgen basqa da dáleldemelermen dáleldendi.

Іstiń mán-jaıyn eskere otyryp, sot oǵan ómir boıyna bas bostandyǵynan aıyrý jazasyn taǵaıyndady. Sottalǵan azamat jazasyn qylmystyq-atqarý júıesiniń tótenshe qaýipsiz mekemelerinde óteıdi.

Úkim zańdy kúshine engen joq.

Eske sala keteıik, ótken jyldyń sońynda Pavlodar oblysynda balalardy zorlaý oqıǵalary jıilep ketkeni týraly dabyl qaqqanbyz 

Keıinirek aldyńǵy oqıǵalarǵa qosymsha balalar úılerindegi qyzdardy zorlaýdyń taǵy 11 deregi tirkeldi.