Pavlodarda oqýshy týberkýlez juqtyrdy degen kúdikpen aýrýhanaǵa jatqyzyldy
PAVLODAR. KAZINFORM — Qyz bala Pavlodar oblystyq ftızıopýlmonologııa ortalyǵyna ornalastyrylǵan. Qazir oǵan qajetti medıtsınalyq em-dom kórsetilip jatyr.
Pavlodar oblystyq bilim berý basqarmasynyń málimetinshe, daryndy balalarǵa arnalǵan № 3 gımnazııa oqýshylarynyń birinde týberkýlezge kúdik bary týraly habarlama 7 qazanda túsken. Ýákiletti organdardyń nusqamasyna sáıkes qajetti profılaktıkalyq jáne epıdemııaǵa qarsy sharalar júrgizilgen.
Al kámeletke tolmaǵan qyz em qabyldaý úshin aýrýhanaǵa jatqyzylǵan. Qazir dárigerler onyń jaǵdaıyn qanaǵattanarlyq dep baǵalap otyr.
— Kámeletke tolmaǵan balanyń densaýlyq jaǵdaıyna qatysty qosymsha aqparat Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» kodeksiniń 273-babyna sáıkes jarııa etýge jatpaıdy. Jaǵdaı baqylaýda, — dep habarlady Pavlodar oblysynyń bilim basqarmasynan.
Sondaı-aq basqarma synyp oqýshylarynda Mantý synamasy júrgizilgenin, oqý kabınetteri men ortaq paıdalanylatyn oryndar dezınfektsııalyq óńdelgenin málim etti. Flıýorografııalyq tekserýden ótý merzimi jaqyndaǵan qyzmetkerlerdi emhanalarǵa baǵyttaý kózdelgen.
Eske sala keteıik, Qaraǵandydaǵy joǵary oqý ornynda úsh stýdent týberkýlez juqtyrǵany aıtyldy.
