Pavlodarda ógeı qyzdaryn zorlap, AITV juqtyrǵan er adam ómir boıyna sottaldy
PAVLODAR. KAZINFORM — Pavlodarda 48 jastaǵy er adam jynystyq sıpattaǵy zorlyq-zombylyq áreketteri men zorlaý qylmystaryn jasaǵany úshin kináli dep tanyldy.
Tergeý nusqasyna súıensek, er adam 2025 jylǵy jeltoqsannyń ortasynda ógeı qyzdaryna zorlyq kórsetken. Áıel birge turatyn er adamǵa 10 jáne 11 jastaǵy eki qyzyn qaldyryp ketken. Er adam mas kúıde bolǵan. Ol eń áýeli kishi ógeı qyzyna, al bir saǵattan keıin úlkenine tıisip, zorlaǵan.
Qylmystyq is jabyq sot otyrysynda qaralyp, istiń barlyq mán-jaıy jarııa etilgen joq.
Sot er adamdy eki bap boıynsha kináli dep tanyǵan.
— Qylmystar jıyntyǵy boıynsha QR Qylmystyq kodeksiniń 58-babynyń 4 jáne 5-bólikterine sáıkes, túpkilikti jaza retinde ómir boıyna bas bostandyǵynan aıyrý, sondaı-aq ómir boıy pedagogıkalyq qyzmetpen jáne kámeletke tolmaǵandarmen jumys isteýge baılanysty laýazymdardy atqarý quqyǵynan aıyrý taǵaıyndalsyn. Jaza tótenshe qaýipsizdik deńgeıindegi qylmystyq-atqarý júıesi mekemesinde ótelsin, — degen úkimdi jarııa etti Pavlodar oblysynyń qylmystyq ister jónindegi mamandandyrylǵan aýdanaralyq sotynyń sýdıasy Janna Nyǵybaeva.
Atap óterligi, er adam áıelmen jáne onyń qyzdarymen 2018 jyldan beri birge turyp kelgen. Qyzdardyń ekeýi de týǵannan aqyl-oı kemistigine shaldyqqan. Úkim zańdy kúshine engen joq.
Eske sala keteıik, Abaı oblysynda erekshe kútimdi qajet etetin balalarǵa 100-den astam ret zorlyq-zombylyq jasalǵan.
