Pavlodarda ofıtser áskerı qyzmetten jaltarýǵa kómektesemin dep aqsha jınaǵan

PAVLODAR. KAZINFORM — Óńirlik qorǵanys isteri jónindegi departamenti bólimniń ofıtseri áskerden jaltarýǵa kómektesýge ýáde berip, shaqyrylýshylardan birneshe ret aqsha alǵan. 

Semeı garnızonynyń áskerı sotynyń úkiminde alaıaqtyq jasaýdyń tórt epızody kórsetilgen. Qyzmettik is-áreketti uıymdastyrý bóliminiń ofıtseri alǵash ret 2023 jyldyń kúzinde shaqyrylýshydan bir mıllıon teńge alǵan. Al 2024 jyldyń maýsym aıynda bir mıllıon, odan soń sol jyldyń qazan aıynda 1,4 mıllıon teńge alǵan. Aqsha alýdyń sońǵy deregi 2025 jyldyń shildesinde tirkelgen. Sońǵy ret «kómek» áskerı jıynǵa shaqyrylǵan zapastaǵy pavlodarlyqqa qajet bolǵan.

Nátıjesinde aqsha bergen shaqyrylýshylardyń barlyǵy áskerı qyzmetke alynbaǵan. Biraq olardyń barmaı qalýyna departament ofıtseriniń eshqandaı yqpaly bolmaǵan. Shaqyrylýshylar jaı ǵana medıtsınalyq komıssııadan ótpeı qalǵan. Olar ózderiniń aldanǵanyn túsinip, Ulttyq qaýipsizdik komıteti departamentine júginedi.

— Sottalýshy úkimniń sıpattamalyq bóliginde kórsetilgen jábirlenýshilerdiń múlkin jymqyrý ýaqytyn, orny men tásilin tolyq rastady. Ol barlyq aqshalaı qarajatty jymqyrǵanyn túsindirdi. Taǵylǵan aıypty, aqsha somasyn daýlamaıdy jáne jasaǵan isine tolyq ókinedi. Qazirgi ýaqytta jábirlenýshilerge keltirilgen materıaldyq shyǵyndy tolyq ótep, olardan keshirim surady. Sondaı-aq sottan bas bostandyǵynan aıyrýmen baılanysty emes jaza taǵaıyndaýdy surady, — delingen Semeı garnızony áskerı sotynyń úkiminde.

Sot taraptardy tyńdap, dáleldemelerdi zertteı kele, ofıtserdiń kinási dáleldendi degen qorytyndyǵa keldi. Sot úkimimen Pavlodar oblysynyń qorǵanys isteri jónindegi departamentiniń 31 jastaǵy burynǵy qyzmetkerine alynǵan somanyń 8 eselengen mólsherinde aıyppul taǵaıyndaldy. Onyń somasy 29 mıllıon teńgeden asady. Bul somany kináli tulǵa jarty jyl ishinde tóleýi tıis.

Eske sala keteıik, Pavlodarda eki polıtseıdi tistep alǵan er adam sottaldy.