Pavlodarda «Nurly jer» baǵdarlamasymen salynatyn páterlerdiń sharshy metri 140 myń teńge bolady
ASTANA. QazAqparat - Bıyl Pavlodar oblysynda jalpy aýmaǵy 91 myń sharshy metrdi quraıtyn 16 turǵyn úı salynbaq. Jańa úılerdiń bir sharshy metri 140 myń teńgeden aspaıdy, dep habarlaıdy pavlodarnews.kz.
Bul týraly oblystyq qurylys jolaýshylar kóligi jáne avtomobıl joldary basqarmasy basshysynyń mindetin atqarýshy Rústem Raısov óńirlik kommýnıkatsııalar qyzmetinde ótken brıfıngde málim etti.
- Memlekettik «Nurly jer» baǵdarlamasy boıynsha 374 páterli 5 kóp qabatty turǵyn úı boı kóteretin bolady. Onyń úsheýi Pavlodar qalasynda, bireýi Ekibastuz qalasynda, bireýi Aqsý qalasynda salynady. Oblys ortalyǵynda salynatyn úılerdiń barlyǵy «Saryarqa» shaǵyn aýdanynda ornalasady. Bul maqsatta respýblıkalyq bıýdjetten 1,7 mlrd. teńge qarastyrylǵan. Sonymen qatar, ústimizdegi jyly 11 nesıelik turǵyn úıdiń qurylysy bastalady. Olardyń altaýy Pavlodar qalasyna, úsheýi Ekibastuz qalasyna, ekeýi Aqsý qalasyna josparlanýda. Osy jyly salynatyn barlyq turǵyn úılerdiń jalpy aýmaǵy 91 myń sharshy metrdi quraıdy. Baǵalary bir sharshy metri 140 myń teńgeden aspaıdy, - deıdi Rústem Raısov.
Nesıelik baǵytta salynatyn 374 páterli bes úı halyqtyń barlyq sanattaryna «Qazaqstan turǵyn úı qurylys jınaq banki» AQ arqyly beriledi.
Sonymen qatar, 212 páterli eki jaldamaly baspana salynady. Onyń biri Pavlodar, ekinshisi Ekibastuz qalasynda turǵyzylady. Mundaı úılerge memleket tarapynan úı alý úshin kezekte turǵan halyqtyń áleýmettik osal toptary qonystanady. Bul úılerdiń barlyǵy memlekettik bıýdjet esebinen qarjylandyrylady.
Sonymen qatar, jekemenshik qurylys kásiporyndar da óz qarajattary esebinen úı turǵyzýǵa qulshynys tanytýda. Máselen, «Báıterek Development» AQ qazirgi tańda tórt turǵyn úıdiń qurylysyn júrgizýden. Odan bólek, taǵy úsh úıdiń qurylysyn qarjylandyrýǵa ótinish bergen.
