Pavlodarda «Nur Otan» bastaýysh uıymdarynyń tuńǵysh aımaqtyq forýmy ótýde
Saıası uıymnyń Pavlodar oblystyq fılıalynyń tóraǵasy Bolat Baqaýov delegattardy is-sharanyń bastalýymen quttyqtap, sáttilik tiledi. - Partııa Tóraǵasy Nursultan Nazarbaev Joldaý men memlekettik baǵdarlamalardy júzege asyrýda bastaýysh partııa uıymdaryna erekshe mán berip otyr. Eldegi modernızatsııalyq úderister júrip jatqan jaǵdaıda partııa aldynda zor mindetter qoıylyp otyr. Osy oraıda BPU qyzmeti erekshe mańyzǵa ıe. Óıtkeni, sizder qarapaıym turǵyndarǵa etene jaqyn qurylymdarda jumys isteısizder. Bastaýysh uıymdar arqyly ıdeologııalyq jumystyń negizgi bóligi júrgiziletinin dep umytpaǵan lazym, - dep atap ótti Bolat Baqaýov.
Qazirgi kezde Pavlodar oblysynda partııanyń 415 bastaýysh uıymyna birikken 65 myń «Nur Otan» múshesi bar. Pılottyq partııalyq jobalar júzege asyrylýda jáne munda pavlodarlyq bastaýysh partııa uıymdarynyń belsendiligi joǵary. Aıtalyq, «Bogatyr Kómir» qoldaýymen Ekibastuzda ІT-synyp ashylsa, «Santehplast» uıymy Pavlodardaǵy kovorkıng-ortalyqtyń ashylýyna járdemdesti. Óz kezeginde aımaqqa jumys saparymen kelgen partııa hatshysy Tamara Dúısenova Nursultan Nazarbaevtyń partııalyqtar aldyna qoıǵan mindetterin sanamalap ótti. - Elbasy qoıǵan mindetterdi oıdaǵydaı júzege asyrýǵa jaǵdaı jasaý forýmnyń basty maqsaty bolyp tabylady. Onyń jumysy birneshe sektsııaǵa bólingen. Forým barysynda partııalyq kadrlyq rezervti qalyptastyrý, spıkerlermen jumys jáne partııalyq bilim berý sekildi mańyzdy máselelerdi talqylaımyz, - deıdi Tamara Dúısenova.
Óskemen qalasynyń №1 saılaý okrýgi BPU tóraǵasy Amantaı Baqyttyń pikirinshe, BPU jumysyndaǵy basty másele kadrlar jetispeýshiligi bolyp tabylady. - Bizdiń uıymymyzda 1200 partııa múshesi tirkelgen. Bizde tolyqqandy jumysty júrgizip, partjobalardy júzege asyrýǵa, is-sharalardy ótkizýge qajetti shtat joq. Sol úshin aımaqtyq fılıaldardan BPU-larǵa kadrlar berilse degen usynys joldaımyz, - dedi ol.
Alqaly jıynǵa Aqmola, Shyǵys Qazaqstan, Soltústik Qazaqstan jáne Pavlodar oblysynan jalpy sany 250 delegat qatysýda. Forým qorytyndysy boıynsha aıtylǵan usynystar BPU belsendiligin arttyrý tujyrymdamasynyń negizine aınalady. Bul qujat qarasha aıynda Astanada ótetin respýblıkalyq BPU forýmynda tanystyrylady.
