Pavlodarda «Nefteresýrs servıs» JShS-nda janarmaı saqtalǵan rezervýar órtendi
ASTANA. QazAqparat - Osydan bir saǵat buryn turǵyndar arasynda «Nefteresýrs servıs» JShS jaqtan shyqqan qoıý qara tútin turǵyndar arasynda kúdik týdyryp, túrli boljam aıtyla bastady, dep habarlaıdy pavlodarnews.kz.
Sol mezette shamamen saǵat 14.28-de oblystyq TJD kezekshisiniń tetigine «Nefteresýrs servıs» JShS aýmaǵynda órt shyqqany týraly habar túsken.
Aldyn ala boljam boıynsha, zaýyttyń suıyqtyqty saqtaýǵa arnalǵan qoımasynan janarmaı syrtqa aǵyp, órt shyqqan.
«Tilsiz jaýdy aýyzdyqtaýǵa jeti tehnıka jiberildi. Órttiń shyǵý saldary men keltirilgen shyǵyna keıinirek anyqtalady», - dedi baspasóz qyzmetinde.
Sondaı-aq atalmysh saıtta órtiń saldarynan eki adamnyń zardap shekkeni aıtylady.
«Bizge túsken naýqastyń bet-aýyzyn ekinshi, úshinshi dárejeli kúıik shalǵan. Jasy 37-de. Jaǵdaıy ortasha. Biraq áli de baqylap jatyrmyz. Sondaı-aq, bıiktikten sekirgen kezde 46 jastaǵy azamat jambasyn aýyrtyp, taban býynyn sozyp alǵan. Jeńil dárejede jaraqat alǵan ol oqıǵa ornynan úıine qaıtaryldy», - deıdi Pavlodar qalalyq №1 aýrýhanasy kúıik bólimshesiniń meńgerýshisi Marat Qanjyǵalın.
