Pavlodarda naýqas balanyń mas ákesi jedel járdem qyzmeti ókilderin sabap tastady
PAVLODAR.QazAqparat - Jedel járdem qyzmetiniń ókilderine naýqas balanyń mas ákesi kúsh qoldanyp, týystary kólikpen qýǵan, dep habarlaıdy QazAqparat.
«Jedel járdem qyzmetiniń ókilderi keshe túnde aýyryp jatqan balany qaraýǵa shyqty. Dárigerler tıisti mekenjaıǵa kelgen soń, balanyń jedel-respıratorly vırýsty ınfektsııa juqtyrǵanyn anyqtady. Dárigerler naýqasty aýrýhanaǵa alyp ketpek bolǵanda, balanyń anasy oǵan qarsy boldy. Osydan soń dárigerler jınalyp ketpek bolyp, kólikterine otyrǵanda, balanyń spırtti ishimdikke masaıǵan ákesi kóliktiń esigin ashyp, mamandarǵa qol jumsaı bastaǵan»,-dedi agenttik tilshisine Pavlodar oblystyq densaýlyq saqtaý basqarmasynyń baspasóz hatshysy Elmıra Temirǵalıeva.
Onyń sózinshe, jedel járdem qyzmetiniń ókilderi kólikterine minip, kezekti jerge shaqyrtýǵa shyqqan. Al, balanyń týystary «djıp» kóligine minip, jedel járdem qyzmetiniń sońyna túsken.
Soqqyǵa jyǵylǵan medıtsına mamandary Pavlodardyń 1 qalalyq aýrýhanasynyń jaraqat bólimine kelgen. Olardy tekserý barysynda mıy shaıqalyp, jabyq bassúıek jaraqatyn alǵany, bet terisine zaqym kelgeni anyqtaldy, dep habarlady oblystyq densaýlyq saqtaý basqarmasynyń ókilderi.
«Olar qazir ambýlatorııalyq em alyp jatyr, aýrýhanaǵa jatýdan bas tartty. Oqıǵanyń derekteri Polıtsııa departamentine joldandy», -dep habarlady densaýlyq saqtaý basqarmasynyń óklderi.
Anton Gagarın
