Pavlodarda nárestesin kótergen áıeldi qaqqan júrgizýshi oqıǵa ornynan izin sýytpaq boldy
PAVLODAR. QazAqparat – Balamen birge egde jastaǵy áıel de zardap shekti, dep habarlaıdy QazAqparat Pavlodarnews.kz saıtyna silteme jasap.
Bul týraly óńirlik densaýlyq saqtaý basqarmasynan málim etti.
«Tórt aılyq náresteniń mıy shaıqalyp, jabyq bas-súıek mıy jaraqattanǵan. Ol oblystyq balalar aýrýhanasyna jetkizildi», - dep naqtylady vedomstvodan.
Zardap shekken 75 jastaǵy áıeldiń keýdesi, jambas súıegi jaraqattanǵan, oń jaq tizesi kógergen. Ol ambýlatorııadan em qabyldaıdy.
Jol-kólik oqıǵasynyń vıdeosy áleýmettik jelide jarııalandy.
Jeli qoldanýshylarynyń málimetinshe, Chokın kóshesi, 95 meken-jaıynda úıdiń aýlasynda bala kótergen adamdy kólik qaqqan. Júrgizýshi izin sýytam dep aýladaǵy oryndyqqa soǵylǵan.
