Pavlodarda nan qymbattady
PAVLODAR. QazAqparat - Pavlodarda birinshi surypty qalypty nannyń baǵasy 15-20 paıyzǵa, ıaǵnı 70 teńgeden 75 teńgege deıin kóterildi, dep habarlaıdy pavlodarnews.kz.
Qalalyq kásipkerlik jáne aýyl sharýashylyǵy bóliminiń aqparatyna súıensek, nan baǵasynyń kóterilýi aptanyń basynan bastap baıqalýda. - Kúndelikti monıtorıng nátıjesinde nan baǵasynyń kóterilgeni anyqtaldy. Qalalyq naýbaıhanalardyń basym kópshiligi nannyń baǵasyn ósirgen. Jalpy qalamyzda 20 naýbaıhana jumys isteıdi. Biz birden oblystyq aýyl sharýashylyǵy jáne kásipkerlik basqarmalaryn bul jaǵdaı týraly habardar ettik,- deıdi bólim basshysynyń orynbasary Arman Asypov.
Oblystyq aýyl sharýashylyǵy basqarmasy aýyl sharýashylyq ónimin daıyndaý jáne óńdeý bóliminiń basshysy Tatıana Nagýlanyń aıtýynsha, baǵanyń ósýine keıbir un tartýshy kásiporyndardyń astyqty joǵary baǵamen satyp alýy áser etken.
«Grýppa Inter» JShS un tartýshy kásiporny astyqty burynǵydaı tonnasyn 47 myń teńgege emes, 52 myń teńgege satyp alǵan. Sondyqtan qalamyzdaǵy keıbir naýbaıhanalar nan baǵasyn 75 teńgege deıin ósirgen»,- deıdi Tatıana Nagýla.
Aıta keterligi, bul baǵa tek birinshi surypty nanǵa qatysty. Al, joǵary surypty nannyń baǵasyna eshbir áseri tımeıdi. Aýyl sharýashylyǵy basqarmasynda atap ótkendeı, oblysta astyq jetkilikti mólsherde. Búginde elevatorlarda 38,2 tonna astyq jınalǵan. Onyń 4,2 tonnasy 2018 jylǵy ónim. Búgingi tańda astyqtyń elevatorlarǵa jetkizilýi jalǵasýda.
