Pavlodarda nan baǵasy 85 teńgeden aspaýy kerek
PAVLODAR. QazAqparat - Erejelerge jáne jalpy qabyldanǵan esepteýlerge sáıkes, qazirgi ýaqyttaǵy naryqta belgilengendeı unnyń bir kelisi 80 teńge bolsa, bir bólke nannyń baǵasy 85 teńgeden aspaýy tıis, dep habarlaıdy pavlodarnews.kz.
Pavlodar oblysy ákiminiń baspasóz qyzmetiniń málimdeýinshe, BAQ-ta jáne áleýmettik jelilerde Pavlodarda áleýmettik nannyń baǵasy 85 teńgeden 105 teńgege kóterildi degen aqparat paıda bolǵannan keıin, oblystyq kásipkerlik jáne saýda basqarmasy men qala ákimdigi arnaıy monıtorıng júrgizdi. Memlekettik organdardyń ókilderi áleýmettik saýda oryndaryn, iri saýda jelileri men úı mańyndaǵy dúkenderdi aralady. Belgili bolǵandaı, nannyń satylý baǵasyn birinshi bolyp «PNTK» JShS kótergen. Búginde atalǵan kásiporynnyń jáne óz ónimderiniń qunyn kótergen basqa da naýbaıhanalardyń áreketterin monopolııaǵa qarsy organdar tekserip jatyr.
Aıta ketý kerek, «PNTK» JShS naryqtaǵy úlesi shamamen 10% quraıdy.
«Pavlodardaǵy saýda jelileri Greenwich, Small, Inmart dúkenderinde qalyptalǵan nan baǵasyn turaqtandyrdy jáne ol nandy 65 teńgeden 85 teńgege deıin satyp alýǵa bolady», - dedi Pavlodar oblysy ákiminiń orynbasary Almas Batanov oblystyq ákimdikte ótken baspasóz máslıhatynda.
«Greenwich, Small jáne Inmart jelileriniń 31 dúkeninde kúnine birinshi surypty unnan daıyndalǵan 3,3 myń bólke satylady. Oǵan qosa, 27 dúkende, onyń ishinde 22 áleýmettik dúkende 1,8 myńnan astam bólke burynǵy baǵamen satylady».Búgingi tańda «Pavlodar» áleýmettik-kásipkerlik korporatsııasynyń turaqtandyrý qory 1 myń tonnadan astam un satyp aldy. Bul oblys ortalyǵyndaǵy dúkenderde satylatyn nan baǵasyn turaqtandyrýǵa septigin tıgizedi.
