Pavlodarda muz keshenin salýǵa 19,9 mlrd teńge bólindi
ASTANA. KAZINFORM - Úkimet Memleket basshysy Quryltaıdyń birinshi sessııasynda qoıǵan mindetteri aıasynda óńirlerdegi áleýmettik ınfraqurylymdy ozyq damytý jumystaryn júrgizip keledi. Osy oraıda Pavlodar qalasynda kópfýnktsıonaldy Muz sport saraıyn salý jobasyna 19,9 mlrd teńge bólindi, dep habarlaıdy Úkimettiń baspasóz qyzmeti.
Jobada Olımpıada talaptaryna saı 400 metrlik konkımen júgirý joly, kanadalyq jáne eýropalyq formattaǵy eki hokkeı alańy, sondaı-aq kerlıngke arnalǵan jolaqtar qarastyrylǵan. Budan bólek, 500 kórermenge arnalǵan trıbýna, jattyǵý zaly, jattyqtyrýshylar men tóreshilerge arnalǵan bólmeler salynady. Keshenniń jalpy aýdany 22 myń sharshy metrden asady. Jobany júzege asyrý bastaldy, nysandy 2027 jyldyń jeltoqsanynda paıdalanýǵa berý josparlanyp otyr.
Nysan paıdalanýǵa berilgennen keıin qysqy sporttyń birden bes olımpıadalyq túrin: konkımen júgirý, shaıbaly hokkeı, mánerlep syrǵanaý, short-trek jáne kerlıngti damytý josparlanyp otyr. Keshenniń ashylýy jańa sport sektsııalaryn uıymdastyrýǵa, tolyqqandy oqý-jattyǵý protsesin ótkizýge jáne túrli deńgeıdegi jarystardy uıymdastyrýǵa qosymsha múmkindik beredi.
Qazirgi ýaqytta 370 myńnan astam turǵyny bar Pavlodar qalasynda 19 hokkeı korty jumys isteıdi. Onyń ishinde 5-eýi jabyq, sondaı-aq muz saraıy men muz arenasy bar. Degenmen qoldanystaǵy nysandar turǵyndar men sport uıymdarynyń qajettilikterin tolyq qamtamasyz etýge jetkiliksiz. Jańa sport kesheni jumys istep turǵan alańdarǵa túsetin júktemeni azaıtyp, qysqy sport túrlerimen aınalysý múmkindikterin keńeıtedi.
Osyǵan deıin Astanada qurylys alańdarynda tekserý kúsheıetini týraly jazdyq.
