Pavlodarda munaı ónimderin vagondap shekaradan shyǵarmaq bolǵandar ustaldy
NUR-SULTAN. QazAqparat – Pavlodar oblysynda vagon-vagon munaı ónimderin shekaradan shyǵarmaq bolǵan kompanııa ókilderi ustaldy. Bul týraly QazAqparat Qazaqstan telearnasyna silteme jasap habarlaıdy.
Telearnanyń habarlaýynsha, Pavlodarda munaı ónimderin vagondap shetel asyrýǵa árekettengen kompanııa ókilderi ustalǵan. Al, keı janar-jaǵarmaı quıý beketteri qoldan qymbatshylyq jasap, baǵany zańsyz kótergen. Jalpy Pavlodar oblysy Reseıdiń úsh birdeı óńirimen shektesedi. Sondyqtan ótkizý beketterinde baqylaý kúsheıtilgen.
Mundaǵy Pavlodar munaı-hımııa zaýyty kúnine 6 myń tonna benzın, týra osynsha kólemde dızel shyǵarady.
Zaýyttyń bas dırektory Qýanysh Bıshimovtiń aıtýyna qaraǵanda, janarmaıǵa suranys artatyn kezeń kelgendikten, zaýyt kesheden beri eki ónimniń de óndiris kólemin 8 myń tonnaǵa arttyrǵan.
«Aımaqtaǵy 147 janarmaı quıý beketiniń 52-si benzın men dızeldi zaýyttan tikeleı alyp otyr. Talonmen bosatý engizilmegen, satylymǵa shekteý joq.
Búgingi tańda biz 2 mln 998 myń tonna munaı óndirdik. Daıyn ónimnen 856 myń tonna benzın, 974 myń tonna dızel otyny shyǵaryldy. Jyldyq josparymyz 5 mln 466 tonna shıki munaıdy óńdeý. Biz ony oryndaımyz», - deıdi zaýyt basshysy.
Óndiriske jaýapty kásiporyn tapshylyq týǵyzbaý úshin osylaı jumys istep jatqanda keı kásipkerler ónimdi kóterme baǵamen satyp alyp, alypsatarlyq arqyly artyq paıda tappaq bolǵan.
Ekonomıkalyq qylmystardy tergep-tekserý departamentiniń bastyǵy Arman Júnisovtiń aıtýynsha, tamyz aıynda Pavlodar óńirinde zańsyz janarmaı aınalymymen aınalysqandarǵa qarsy eki is qozǵalǵan.
«Bizde bir kompanııa Ózbekstan men Tájikstanǵa detonatsııaǵa qarsy qospa retinde kórsetip, on vagon munaı ónimderin shyǵarmaq boldy. Vagondardy teksergen kezde ishindegisi qospa emes, benzın bolyp shyqty.
Sondaı-aq, shalǵaı aýyldardaǵy jaǵarmaı beketterinde munaı ónimderi qymbat baǵamen satylǵan. Qazir tekserý júrip jatyr», - deıdi departament basshysy.
Oblystyq tabıǵı monopolııalardy retteý departamentiniń basshysy Ibragım Tangıev benzın baǵasyn orynsyz kóterý deregi bolǵanyn rastap otyr.
«Bizdiń departamentke Maı aýdany ákishiliginen hat tústi. Janar-jaǵarmaı baǵasyn negizsiz qymbattatyp otyr delingen. Rasynda da «AI-92» markaly benzıniń baǵasyn 8 teńgege kóterip jibergen. Al, dızeldi 230 teńgeden emes, 250 teńgeden satqan. Kásipkerge 100 aılyq eseptik kórsetkish kóleminde aıyppul salyndy. Taǵy qaıtalasa, satylymdaǵy ónimdi tárkilep, lıtsenzııasynan aıyramyz», -deıdi ol.
Qazir Pavlodar oblysynda munaı ónimderi tapshylyǵyn týdyrmas úshin keshendi jumys jospary bekitilip, tekserýshi, baqylaýshy organdar tegis jumyldyrylǵan.
Eske salsaq, Energetıka mınıstrliginiń usynysymen elimizde tranzıttik kólikterge dızel otyny saralanǵan baǵamen satylyp jatyr.
