Pavlodarda múgedek balalardy ońaltý ortalyǵynyń shatyrynan sý aǵyp tur
PAVLODAR. QazAqparat - «Samal» ońaltý ortalyǵy» múgedekter qoǵamdyq birlestigi ǵımarat shatyryn jóndeýge qarjy izdep jatyr. Kóktemgi jańbyr maýsymynda ortalyqtyń tóbesinen sý aǵyp tur, dep habarlaıdy «QazAqparat» HAA.
«Balalar mundaı jerde bolmaýy kerek. Qalaı degenmen tóbeden aqqan sý aýany ylǵaldandyryp jiberedi, - deıdi mundaǵy tárbıelenýshilerdiń biriniń anasy Janar Janaqova. - Balalardyń onsyz da ımmýnıteti tómen, jıi aýyrady».
«Samal» ortalyǵynyń basshylyǵy buǵan deıin túrli mekemelerge hat jazyp kórgen, alaıda onysynan esh nátıje shyqpapty. Bılik ókilderi uıym ǵımaratty ózi jóndeýi kerek degen jaýap joldaǵan. Sebebi bul ortalyqqa memlekettik tapsyrys bergendegi basty talap sondaı bolǵan kórinedi.
Búginde munda mentaldyq aýytqýy bar 110 bala tárbıelenedi. Olar dál balabaqshadaǵydaı tálim alady, mundaǵy erekshelik - balalarǵa qosymsha medıtsınalyq qyzmetter kórsetiletindiginde.
Ákimdik ortalyqqa senimgerlik basqarý arqyly burynǵy balabaqsha ǵımaratyn bergen jáne jyl saıyn áleýmettik tapsyryp berip turady. Dırektor Zınaıda Bagnenkonyń aıtýynsha, bul qarjy balalardy kútip-baǵýǵa, sondaı-aq olardyń dári dármegine jumsalady. Al jóndeý jumystaryna jetpeıtin kórinedi. Sebebi shatyrdy jóndeýge shamamen 11 mln teńge qajet eken.
Ákimdik bul máseleni sheshýge demeýshi tartýǵa bolatynyn alǵa tartady. Alaıda ázirge qol ushyn beretin eshkim tabyla qoımaǵan.
