Pavlodarda monıtorıng toby týǵan kún keshiniń ústinen tústi

PAVLODAR. QazAqparat – Pavlodarda týǵan kún toılaý úshin jekemenshik turǵyn úıde jınalǵan bir top jastar polıtsııa bólimine jetkizildi, dep habarlaıdy QazAqparat.

«31 qazan kúni saǵat 22:30-da Pavlodar qalasy polıtsııasynyń kezekshi bólimine Isınalıev kóshesinde ornalasqan jekemenshik úılerdiń birinde saýyq keshi ótip jatqany týraly habarlama kelip túsken. Atalǵan mekenjaıǵa kelgen tártip saqshylary bul úıde jastardyń týǵan kún toılap jatqanyn anyqtady», - dep baıandady Pavlodar oblysy jergilikti polıtsııa qyzmetiniń bastyǵy Ǵalym Sargulov.

Polıtseıler jas azamattardy Pavlodar qalasynyń ortalyq polıtsııa bólimine jetkizdi.

Olarǵa jáne úı ıesine qatysty karantın rejımin buzý faktisi boıynsha materıal jınalyp, QR Ákimshilik quqyq buzý týraly kodekstiń 425-baby boıynsha ákimshilik jaýapkershilikke tartý úshin taýarlar jáne qyzmetterdiń sapasy men qaýipsizdigin baqylaý basqarmasyna jiberildi.