Pavlodarda merdigerlerdiń 20 qurylys lıtsenzııasy toqtatyldy
PAVLODAR. KAZINFORM - Qurylys kompanııalaryna jospardan tys 63 tekserý júrgizilgen. Nátıjesinde ákimshilik quqyq buzýshylyqtar boıynsha 85 hattama toltyrylyp, salynǵan aıyppuldardyń jalpy somasy 36,6 mln teńgeni quraǵan.
Oblystyq memlekettik sáýlet-qurylys baqylaý basqarmasynyń basshysy Qazbek Arantaevtyń habarlaýynsha, eń jıi anyqtalǵan zańbuzýshylyqtar qatarynda qurylys-montaj jumystaryn habarlama jibermeı júrgizý, jobalyq qujattamanyń jáne memlekettik saraptamanyń oń qorytyndysynyń bolmaýy, sondaı-aq qurylys sapasyna qoıylatyn talaptardyń saqtalmaýy bar.
- Esepti kezeńde jospardan tys 63 tekserý júrgizilip, nátıjesinde ákimshilik quqyq buzýshylyqtar boıynsha 85 hattama toltyryldy. Salynǵan aıyppuldardyń jalpy somasy - 36,6 mln teńge. Sot sheshimimen Pavlodar qalasynda óz betinshe salynǵan eki nysan súrilýge jatady. Prokýratýranyń usynysy negizinde qurylys, jobalaý jáne ınjenerlik izdenis qyzmetimen aınalysatyn 52 lıtsenzıat ákimshilik jaýapkershilikke tartylyp, salynǵan aıyppuldardyń jalpy somasy 6,4 mln teńgeni qurady. Sonymen qatar, 20 lıtsenzııanyń qoldanylýy toqtatyldy, - dep málimdedi basqarma basshysy.
Eske sala keteıik, Almatyda 350 qurylys kompanııasynyń lıtsenzııasy toqtatyldy.
