Pavlodarda Memlekettik týdy dronmen kóterýden rekord ornatyldy
PAVLODAR. KAZINFORM - QR Konstıtýtsııasynyń 30 jyldyǵy aıasynda el tarıhynda alǵash ret kólemi 16 × 8 metr bolatyn Memlekettik Týymyz dronnyń kómegimen kókte jelbiredi.
Memlekettik Tý aıtýly dataǵa arnaıy daıyndalǵan, salmaǵy 60 kılogram. Júk kótergishtigi 120 kılogramm bolatyn bir dron týdy 180 metr bıiktikke kóterip, Pavlodar qalasynyń ortalyq jaǵalaýynda ornalasqan bas sahna - «Ertis Promenade» ústinen alyp ótti. Buǵan deıin álemde mundaı kólemdegi týdy úsh dronnyń kómegimen alyp ushqan eken. Ertis jaǵasynda jańa rekord tirkelip otyr.
Rekordty resmı tirkeý úshin Pavlodarǵa WBR (Dúnıejúzilik rekordtar kitaby) Azııa jáne Afrıka elderi boıynsha rekordtardy tirkeý jónindegi bas ofıtseri Qudaıbergenov Qýandyq arnaıy keldi.
Atalǵan is-shara oblys ákimdiginiń, oblystyq mádenıet, tilderdi damytý jáne arhıv isi basqarmasynyń qoldaýymen iske asty.
«Bul jobany biz tek rekord ornatý múmkindigi retinde ǵana emes, ulttyq birliktiń jáne qazaqstandyq patrıotızmniń sımvoly retinde qarastyramyz. Jas urpaq úshin bul Otanǵa, halqyna jáne Memlekettik rámizderge degen súıispenshilikti aıqyn sezindiretin jarqyn belgi bolmaq», - dep atap ótti is-sharany uıymdastyrýshy «Shańyraq» halyq shyǵarmashylyǵy jáne mádenı-saýyq qyzmeti ortalyǵynyń ókilderi.
Buǵan deıin Ertis boıynda tigilgen alyp kımeshek halyqaralyq rekordtar kitabyna engen.