Pavlodarda memlekettik satyp alýlar zańnamasyn buzǵan sheneýnikter jazalandy
PAVLODAR. KAZINFORM — Jergilikti ákimdik qyzmetkerleri Ákimshilik quqyq buzýshylyq týraly kodekstiń 207-babynyń 10-bóliginde kórsetilgen buzýshylyqtar úshin jaýapqa tartylǵan.
«Memlekettik satyp alý týraly» zańnyń 8-babynda memlekettik satyp alýǵa josyqsyz qatysýshy dep taný týraly talap qoıýmen sotqa júginý úshin 30 kúndik merzim kózdelgen. Óńirlik prokýratýranyń habarlaýynsha, tapsyrys berýshiler, ıaǵnı memlekettik mekemeler (kásiporyndar) bul talaptardy júıeli túrde buzady.
— Ákimshilik quqyq buzýshylyq týraly kodekstiń 207-babynyń 10-bóliginde laýazymdy adamdardyń jaýaptylyǵy kózdelgen. Mysaly, mamandandyrylǵan aýdanaralyq ekonomıkalyq sottyń 2025 jylǵy 27 qarashadaǵy sheshimimen «Ekibastuz qalasy Shiderti kenti ákiminiń apparaty» MM-niń «Ámir» JK-ni memlekettik satyp alýǵa josyqsyz qatysýshy dep taný týraly talap qoıýyn qanaǵattandyrýdan bas tartyldy. Sebebi talapker sotqa kesh júgingen, — dep habarlady prokýratýradan.
Іs materıaldaryna súıensek, ónim jetkizýshi shartta kózdelgen merzimderdi buza otyryp, talaptardy tıisinshe oryndamaǵan. Al sharttyq mindettemelerdiń oryndalýyn buzý deregi talapkerge 2025 jylǵy 15 qyrkúıekte belgili bolǵan. Alaıda talap qoıý 2025 jyldyń 29 qazanynda ǵana sotqa berilgen.
Atalǵan normalardyń saqtalýyn taldaý nátıjeleri boıynsha oblys prokýratýrasy Іshki memlekettik aýdıt departamentine qadaǵalaý aktisin engizdi. Ýákiletti organ 7 laýazymdy tulǵany ákimshilik jaýapkershilikke tartyp, aıyppul salǵan.
Buǵan deıin Pavlodarda áriptesterimen daýys kótere sóılesken sheneýnikti jazalaý usynylǵan edi.
