Pavlodarda memlekettik qyzmet salasynda qandaı mamandar jetispeıdi

PAVLODAR. KAZINFORM – Qazirgi ýaqytta oblysta memlekettik qyzmet boıynsha 90-nan astam vakansııa bos tur. Onyń basym bóligi – aýyldyq jerlerde. 

Pavlodar oblysynda 3 599 memlekettik qyzmetshi bar. Aýyldyq jerlerde 900-ge jýyq memlekettik qyzmetshi jumys isteıdi. Memlekettik qyzmettegilerdiń 70%-y, ıaǵnı 2 514-i – áıel adam. Bulardyń ishinde 433 áıel adam laýazymdyq qyzmetterdi atqaryp otyr.

– Óńirdegi memlekettik qyzmettiń negizgi baǵyttarynda kadrlar tapshylyǵy baıqalady. Asa suranysqa ıe mamandardan ekonomıster, býhgalterler, zańgerler, sondaı-aq, aýyl sharýashylyǵy, qurylys jáne ınjenerlik-óńdeý salasynyń mamandaryn aıtýǵa bolady. Jalpy 90-nan astam maman qajet bolsa, onyń 80-i aýyldyq jerlerge tán, - deıdi QR Memlekettik qyzmet isteri agenttiginiń Pavlodar oblysy boıynsha departamentiniń basshysy Madııar Ábildın.

Memlekettik qyzmetshilerdiń ortasha jasy 42,1 jasty qurap otyr. Kadrlardyń «qartaıý» protsesi baıqalmaıdy. Bul rette kadrlar quramyn birtindep jańartý jáne memlekettik qyzmetke jas mamandardy tartýǵa mán berilip jatyr. Kásibı áleýetin neǵurlym tıimdi paıdalaný maqsatynda kadrlardy josparly rotatsııalaý júzege asyrylady. «B» korpýsynyń memlekettik ákimshilik qyzmetshilerin rotatsııalaýdyń 2025 jylǵa arnalǵan josparyna sáıkes, oblystyq basqarmalar basshylary men basshylarynyń orynbasarlary, sondaı-aq qala jáne aýdan ákimderiniń orynbasarlary qatarynan 9 memlekettik ákimshilik qyzmetshi rotatsııalanǵan.

Atap óterligi jergilikti memlekettik organdar tarapynan konkýrstyq irikteý máseleleri boıynsha zańbuzýshylyqtar azaıǵan. 

Eske sala keteıik, memlekettik qyzmetshilerge jasandy ıntellekt kýrstary mindetti bolady.