Pavlodarda memlekettik tildi damytýǵa úles qosqan zııaly qaýym ókilderi marapattaldy
PAVLODAR. QazAqparat - Ardagerler úıinde oblystyń zııaly qaýym ókilderi jáne til janashyrlarymen merekelik kezdesý ótti, dep habarlaıdy Pavlodarnews.kz.
Bul týraly Pavlodar oblysynyń mádenıet, tilderdi damytý jáne arhıv isi basqarmasy málim etti.
- 1 qazan – Halyqaralyq qarttar kúni. Elimizde jyl saıyn bul kún qarttarymyzdyń ǵumyr boıy istegen eńbekterine ári memleketimizdiń qalyptasýyna qosqan zor úlesterine saı syı-qurmet kórsetiledi. Osy oraıda mereke qarsańynda basqarmamyz oblystyń zııaly qaýym ókilderi jáne til janashyrlarymen merekelik kezdesý uıymdastyrdy, - dedi basqarmada.
Atalǵan sharaǵa Halyqaralyq «Qazaq tili» qoǵamy oblystyq fılıalynyń tóraǵasy men músheleri, oblystyq ardagerler keńesiniń, «Nur-Ana álemi» qoǵamdyq birlestiginiń Pavlodar oblysy boıynsha fılıalynyń jáne «Aqsaqaldar taǵylymy» qoǵamdyq birlestiginiń, sondaı-aq jergilikti zııaly qaýym ókilderi qatysty.
Kezdesý barysynda Prezıdent Qasym-Jomart Toqaevtyń halyqqa joldaýyndaǵy qazaq tiliniń ultaralyq qatynys tili retinde qalyptasý baǵytyndaǵy mindetterdi anyqtaý, ulttyq salt-dástúrlerdi nasıhattaý jáne jańǵyrtý boıynsha máseleler talqylandy, - dedi basqarmada.
Kezdesý sońynda memlekettik tildiń damýyna zor jaýapkershilikpen qarap, jas urpaqty halqymyzdyń ádet-ǵuryp, salt-dástúrimen sýsyndatyp, dostyq pen birlikti nyǵaıtýǵa, Qazaqstannyń bolashaǵy jolynda atqaryp jatqan eleýli eńbegi úshin jergilikti zııaly qaýym ókilderi basqarma tarapynan alǵys hattarmen marapattaldy.
