Pavlodarda memlekettik mekemeler eski úlgidegi eltańbalardy 1 aı ishinde aýystyrýy tıis
Bul týraly óńirlik kommýnıkatsııalar qyzmetinde ótken baspasóz konferentsııasynda QR IDM tehnıkalyq retteý jáne metrologııa komıteti Pavlodar oblysy boıynsha departamentiniń basshysy Aıbek Álibaev málim etti. «Qazirgi tańda ulttyq standarttarǵa sáıkes memlekettik rámizderdi shyǵarý men olardy paıdalaný eń mańyzdy máselelerdiń biri bolyp tabylady», - deıdi Aıbek Álibaev.
QR Indýstrııa jáne jańa tehnologııalar mınıstrligi 2014 jyldyń mamyrynda QR ST 989 - 2014 «Qazaqstan Respýblıkasynyń Memlekettik Eltańbasy. Tehnıkalyq sharttar» ulttyq standartyn bekitti. Jańa standartqa sáıkes Eltańba bederindegi árbir bólshektiń ataýy men ólshemi naqtylandy. Birtekti baqylaý tártibi engizildi. Taǵy bir ereksheligi - 3D nusqasy. Bul barlyq ólshemderin dál shyǵaryp beredi.
Spıkerdiń aıtýynsha, departament 2015 jyldan beri oblystyq ishki saıasat basqarmasy birge barlyq memlekettik mekemelerdi aralap, aýdandar men qalalardyń ákimderine osy máselege qatysty hat joldaǵan. Budan keıin barlyq memlekettik mekemeler, ákimdikter bıýdjetke qarajat josparlaýy tıis bolǵan. Búgingi tańda kóptegen uıymdar men mekemeler jańa standartqa saı Eltańbalaryn aýystyrǵan.
«2017 jyldyń basynan qaladaǵy jáne Sharbaqty aýdanynda memlekettik rámizderge júrgizilgen monıtorıng nátıjesinde 80 mekeme tekserilip, óreskel buzýshylyqtar anyqtalmady. Memlekettik Týlar men Eltańbalardy satyp alýǵa lıtsenzııasy bar kásiporyndar ǵana memlekettik satyp alý arqyly qatysa alady. Pavlodar oblysynda mundaı qyzmet túrimen «Ásel jarnama» JK aınalysady. Ulttyq standarttar saqtalmaǵan jaǵdaıda aıyppul salynady», - deıdi Aıbek Álibaev.
