Pavlodarda mektepten 485 adam evakýatsııalandy
PAVLODAR. QazAqparat - Pavlodardaǵy № 1 jalpy orta bilim berý mektebinde oryn alǵan órtti joıý boıynsha praktıkalyq oqý-jattyǵý ótti.
Sharany qalalyq tótenshe jaǵdaılar basqarmasy jedel-qutqarý jasaǵynyń jedel qyzmetterimen birge adamdar kóp jınalatyn ǵımaratta uıymdastyrdy, dep habarlaıdy pavlodarnews.kz.
«Kishi jáne joǵary synyp oqýshylary, qyzmetkerler syrtqa shyǵaryldy. Órt sóndirý qyzmeti shartty túrde mekteptegi órtti sóndirdi. Ottyń taralýyn boldyrmaý maqsatynda japsarlas úı-jaılardy qorǵaýǵa oqpandar berildi»,- deıdi qalalyq TJB-nyń ınjeneri Aıajan Jasulanov.
Sonymen qatar órt sóndirý qyzmetiniń qyzmetkerleri adamdardy izdeý jáne qutqarý sharalaryn júzege asyrdy. Іzdeý barysynda úsh oqýshy tabylǵan. Qutqarý operatsııasy kezinde jedel-qutqarý jasaǵynyń qyzmetkerleri alpınıstik jabdyqtardyń kómegimen ǵımarattyń úshinshi qabatynan mektep ǵımaratynda qalǵan oqýshylardy evakýatsııalady. Avtomatty órt dabylynan oblystyq TJD Biryńǵaı kezekshi-dıspetcherlik qyzmetiniń pýltine habarlama tústi. Bul departament qyzmetkerlerine kelip túsken shaqyrýlarǵa jedel áreket etýge jáne órtti erte anyqtaý monıtorınginiń avtomattandyrylǵan júıesiniń «112» qyzmetimen ózara is-qımylyn tekserýge múmkindik berdi.
Atalmysh aktsııanyń maqsaty - oqytýshylar quramy men tehnıkalyq qyzmetkerlerdi shuǵyl jaǵdaılarda is-qımyl jasaýǵa úıretý. Bul kúni órt sóndirýshiler uldar men qyzdarǵa órt sóndirýshiniń jumys erekshelikteri, tynys alý organdaryn qorǵaý quraldary jáne arnaıy qorǵaý kostıýmderi týraly aıtyldy. Arnaıy tehnıka men jabdyqtar kórmesin uıymdastyrdy. Órt sóndirýshiniń kıimin kıip, órt sóndirý avtokólikteriniń róline otyrýǵa múmkindik berdi.
