Pavlodarda mektep jármeńkesi ótti
PAVLODAR. QazAqparat - Estaı atyndaǵy qalalyq mádenıet saraıynda úsh uıymnyń ókilderi turǵyndarǵa mektepke arnalǵan taýarlardy arzandatylǵan baǵamen usyndy, dep habarlaıdy pavlodarnews.kz.
Jármeńke saǵat 10:00-de bastalyp, 18:00-ge deıin jalǵasty. Pavlodarlyqtarǵa oqýǵa kerekti taýarlar 15-20 paıyz jeńildikpen satyldy.
«Biz albomdy, boıaýlardy, qaryndashtardy, dápterlerdi jeńildetilgen baǵamen aldyq», - dedi qala turǵyny Janar Ámirkenova. - Sharanyń aıasy shekteýli ekeni ókinishti. Kıimderdi qarastyrmaq bolǵanbyz».
Qalalyq bilim bólimi bas mamany Saǵyndyq Shákenovtiń aıtýynsha, jármeńkege segiz uıym qatysady dep josparlanǵan.
«Mektepke arnalǵan kıimdermen aınalysatyn uıymdar sońǵy sátte bas tartty», - dedi Saǵyndyq Shákenov. - Ata-analar balalaryna kıim alýlary úshin taǵy bir jármeńke uıymdastyrýymyz múmkin».
