Pavlodarda mektep taýarlaryn tómen baǵamen satatyn dúken ashylmaq
PAVLODAR. QazAqparat - Pavlodar oblysynda «Mektepke jol» qaıyrymdylyq aktsııasy bastaldy, dep habarlaıdy «QazAqparat» HAA tilshisi.
Bıylǵy aktsııa «Balalarǵa kómek - meniń tańdaýym!» urany aıasynda ótpek. Aktsııanyń maqsaty - oqý jylynyń bastalýyna daıyndyq kezinde áleýmettik jaǵynan az qamtylǵan, kópbalaly otbasyndaǵy, jetim jáne ata-anasynyń qamqorlyǵynsyz qalǵan balalarǵa materıaldyq jáne basqa da qoldaý kórsetý. Bul týraly Pavlodar oblysy bilim basqarmasy málim etti.
Sondaı-aq osy jyly kásipkerlerdi tarta otyryp, jármeńkeler men mektep taýarlaryn tómen baǵada saýdalaıtyn kóshpeli avtodúken uıymdastyrý josparlanyp otyr.
Aıta keteıik, 2016 jyly uıymdastyrylǵan dál osyndaı aktsııa barysynda oblystaǵy jalpy bilim beretin orta mektepterdiń 16 394 oqýshysyna 139 mıllıon 636 myń 400 teńgeniń kómegi kórsetilgen bolatyn.
