Pavlodarda mektep oqýshylary ótkir ıisti hımııalyq preparattan ýlanyp qaldy
PAVLODAR. KAZINFORM — Pavlodardaǵy mektepterdiń birinde ótkir ıisi bar tabletkalar anyqtalyp, sabaqtan keıin tórt oqýshy ózin jaısyz sezingen. Úsh bala aýrýhanaǵa júginip, ambýlatorııalyq em qabyldaǵan.
Óńirlik bilim berý basqarmasynyń málimetinshe, oqıǵa Pavlodardaǵy № 11 mektepte oqý kabınetteriniń birinde bolǵan.
— 2026 jylǵy 12 qazanda Pavlodardaǵy mektepterdiń biriniń oqý kabınetinde ótkir ıisi bar tabletkalar anyqtaldy. Sabaqtan keıin tórt oqýshy ózin jaısyz sezine bastady. Tekserý nátıjeleri boıynsha olardyń jaǵdaıy qanaǵattanarlyq dep baǵalandy, — dep habarlady bilim berý basqarmasynan.
Mektep ákimshiligi tarapynan ishki tekserý júrgizilgen. Tekserý qorytyndysy boıynsha jaýapty qyzmetkerlerge qatysty tártiptik sharalar qabyldanǵan. Ýlanýǵa sebep bolǵan zattyń naqty ataýy men quramy týraly aqparat joq.
Sol kúni Pavlodar oblystyq balalar aýrýhanasyna 2014 jáne 2015 jyldary týǵan úsh bala ýlaný belgilerimen júgingen.
— Kezekshi pedıatrdyń tekserýinen keıin balalar ambýlatorııalyq baqylaýǵa jiberildi — dep habarlady oblystyq densaýlyq saqtaý basqarmasynan.
Eske sala keteıik, Mańǵystaýda balyqtan ýlanǵan tórt adam jansaqtaý bólimine tústi.
