Pavlodarda mektep ınspektory uryny ustady
ASTANA. QazAqparat - Pavlodar qalasynda mektep ınspektory Mahabbat Qısatova mektep kabınetteriniń birinen sómke urlap bara jatqan 40 jastaǵy Aqmola oblysynyń turǵynyn qolǵa túsirdi, dep habarlaıdy pavlodarnews.kz .
Oblystyq ІІD-nyń baspasóz qyzmetiniń málimetinshe, er adam oqý ornyna eshbir adamnyń shaqyrýynsyz kirgen. Kabınetterdiń birinen ishinde «Nokia» uıaly telefony jáne 20 myń teńgesi bar áıeldiń sómkesin alyp, birden syrtqa betteıdi. Alaıda, kúdiktiniń sýyt júrisin birden baıqap qalǵan ınspektor Mahabbat Qısatova sol jerde toqtatyp tergeýge alady. Er adam qashyp ketýge tyrysqan. Alaıda názik jandynyń batyldyǵynyń arqasynda onyń urlyǵy áshkere boldy.
«Ury kinásin tolyq moıyndap, mundaı áreketke óziniń úıine jetý úshin shuǵyl túrde aqsha kerek bolǵandyqtan barǵanyn túsindirgen. Tipti, buǵan deıin de birneshe ret sottalǵany belgili boldy. Kúdikti azamatqa qatysty urlyq jasaý faktisi boıynsha QR Qylmystyq kodeksiniń 188-baby boıynsha sotqa deıingi tergeý jumystary júrgizilýde. Qazirgi tańda ol ýaqytsha ustaý ızolıatorynda otyr. Іstiń qalaı aıaqtalatynyn tergeý amaldary kórsetedi», - deıdi baspasóz qyzmeti.
Aıta keteıik, polıtsııa leıtenanty Mahabbat Qısatova Almatydaǵy QR Іshki ister mınıstrliginiń akademııasyn bitirgen. Іshki ister organdarynda 2016 jyldan beri qyzmet isteıdi.
