Pavlodarda mekenjaı anyqtamasyn suraǵan 6 mektep dırektory jazalandy
PAVLODAR. QazAqparat - Pavlodar oblysy sybaılas jemqorlyqqa qarsy is-qımyl vedomstvosy oqýshylardan mekenjaı anyqtamasy jáne basqa qujattardy talap etken mektep dırektorlaryna jaza qoldandy, dep habarlaıdy QazAqparat tilshisi.
«Departament (Memlekettik qyzmet isteri jáne sybaılas jemqorlyqqa qarsy is-qımyl agenttiginiń Pavlodar oblysy boıynsha departamenti - Red.) bilim bólimimen birlese Pavlodardaǵy jalpy bilim beretin orta mektepterde tekseris júrgizdi. Sonyń nátıjesinde, mektepter mekenjaı anyqtamasyn jáne standartta kórsetilmegen basqa da qujattardy talap etkeni anyqtaldy», - dep málimdedi departamenttiń baspasóz qyzmeti.
Óńirlik vedomstvo «Azamattarǵa arnalǵan úkimet» memlekettik korporatsııasymen birge taldaý júrgizip, Pavlodar oblysynyń shamamen bir jarym myń turǵyny halyqqa qyzmet kórsetý ortalyqtaryna bir rettik anyqtamalar jáne basqa da qujattardy alý úshin júginetinin anyqtady. Oqý jylynyń basynda memlekettik korporatsııanyń fılıaldarynyń aldynda adamdar uzyn-sonar kezekke turǵan.
Olardyń kópshiligi bilim mekemelerine berý úshin mekenjaı anyqtamasyn alǵany belgili boldy.
«Osyǵan baılanysty, standartta belgilenbegen qujattardy talap etip, «Memlekettik qyzmetter týraly» Zańnyń 5-babynyń 2-tarmaǵyn buzǵany úshin Pavlodardyń №№ 9, 11, 26, 29, 32, 41 jalpy bilim beretin orta mektepteriniń dırektorlary tártiptik jazaǵa tartyldy. Departament Pavlodar oblystyq bilim basqarmasyna bilim oshaqtary men mektepke deıingi bilim mekemelerinde basqa mundaı jaǵdaıdyń qaıtalanýyna jol bermeý qajettigi eskertildi», - delingen habarlamada.
Departament turǵyndardy, anyqtamalar jáne basqa da qujattardy retteýge asyqpastan, memlekettik qyzmetter standartynda kórsetilgen qujattar tizimimen durystap tanysyp alýǵa shaqyrady.
