Pavlodarda Májilis depýtattary fýtbol jattyqtyrýshylarymen júzdesti
PAVLODAR. QazAqparat - «Ertis» FK baspasóz qyzmeti habarlaǵandaı, Májilis depýtattary Magerram Magerramov pen Narıne Mıkaelıan óskeleń urpaqty salaýatty ómir súrý saltyna baýlý isinde balalar fýtbolyn damytý erekshe mańyzǵa ıe ekendigin atap ótti, dep habarlaıdy pavlodarnews.kz «Ertis» FK baspasóz qyzmetine silteme jasap.
«Fýtboldy aýyldyq jerlerde damytý úshin qarajat bólý kerek. Aýylda fýtbol oınaımyn, kásipqoı fýtbolshy bolamyn deıtin daryndy balalar jetedi. Alaıda olar qalalarǵa baryp jattyǵa almaıdy. Sondyqtan jergiilikti jerlerde sport keshenderin salý mańyzdy»,- deıdi Narıne Mıkaelıan.
Óz kezeginde Magerram Magerramov fýtbol ortalyqtary men akademııalarda jumys isteıtin jattyqtyrýshylardyń biliktiligin únemi arttyrýdy esten shyǵarmaý kerektigine basa nazar aýdardy.
«Ertis» fýtbol ortalyǵynyń basshysy Vıacheslav Kazakovtyń aıtýynsha, balalardyń jattyǵýlaryna qajet jaǵdaı jaqsarýda.
«Bıyldan bastap shákirtterimiz jyly manejde jattyǵýǵa múmkindik aldy», - deıdi Vıacheslav Kazakov. «Balalarǵa qolaıly jaǵdaı jasaldy. Nátıjelerimiz de soǵan sáıkes bolady dep senemiz. Byltyr alty jas sanattaryndaǵy tórt komandalarymyz Qazaqstan chempıonatarynyń júldegerleri atandy, bireýi tipti chempıon boldy».
