Pavlodarda Májilis depýtattary bastaýysh partııa uıymdarynyń ókilderimen kezdesti
ASTANA. QazAqparat - «Nur Otan» partııasy Pavlodar oblystyq fılıalynda QR Parlamenti Májilisiniń depýtattary Álııa Saparova, Quralaı Qaraken, Serik Qusaıynov, Sáken Ótebaev jáne Narıne Mıkaelıanniń Pavlodar oblysy bastaýysh partııa uıymdary ókilderimen kezdesýi ótti.
Kún tártibi boıynsha Qazaqstan Respýblıkasy Prezıdentiniń bılik tarmaqtary arasynda ókilettikterdi qaıta bólý máseleleri jónindegi úndeýi men Qazaqstan halqyna Joldaýy talqylandy, dep habarlaıdy Májilistiń baspasóz qyzmeti.
Otyrys moderatory, «Nur Otan» partııasy Pavlodar oblystyq fılıaly tóraǵasynyń birinshi orynbasary Ilıa Terenchenko óz sózinde Memleket basshysynyń usynǵan bastamalarynyń asa mańyzdylyǵyn atap ótti.
Májilis depýtaty Sáken Ótebaev jıynǵa qatysýshylarǵa Prezıdent bastamalarynyń basym baǵyttaryn túsindirip, pavlodarlyqtardyń jıi qoıatyn saýaldaryn sanamalap berdi.
- Qazir bul qujattardy talqylaý belsendi túrde júrip jatyr. Aıdyń sońyna deıin barlyq usynystardy tyńdaýymyz kerek. Bılik ókilettikteriniń bólisinen keıin olardy teris paıdalanýshylyqtar qylań bermeı me dep suraıdy keıbir adamdar. Buǵan aıtarym, Parlament pen Úkimet ókilettikteri óte naqty, ári anyq jazylǵan. Sondyqtan eshbir teris paıdalanýshylyqtar múmkin emes, - dep jaýap qaıyrdy Májilis depýtaty.
Sonymen birge, halyq qalaýlylary partııanyń oblystyq fılıalynda azamattardy jeke saýaldary boıynsha qabyldap, onda qarapaıym pavlodarlyqtardyń muń-muqtajdarymen tanysty. Máselen, «RedZone» QB tóraǵasy Konstantın Mýzalevskıı V sanatyndaǵy júrgizýshilerdiń avtomektepterde mindetti oqytylýy jóninde saýal qozǵady. Onyń sózine qaraǵanda, bul jol júrýdiń qaýipsizdigi men mádenıetin arttyrýǵa septigin tıgizedi. Májilis depýtattary qoǵam belsendisine bul máseleni parlamenttik komıssııalar otyrystarynda talqylaýǵa ýáde berdi.
