Pavlodarda masalardy ýlaýmen ushaqtar aınalysady
ASTANA. QazAqparat - Pavlodar qalasynyń jaǵalaýy men 43 saıabaqta shybyn-shirkeıge qarsy kúresti merdigerler júrgizedi. Óńdeý jumystary áýeden de júzege asyrylady, dep habarlaıdy pavlodarnews.kz.
Merdigerlerdiń qatysýymen ótken jumys otyrysynda óńdeletin aýmaqtyń alańy 7 215 gektardy quraıtyny anyqtaldy. Oǵan Moıyldy kentindegi 25 gektar jer qosylady. Qol jetpeıtin oryndar men sý aıdyndaryna áýeden óńdeý jasalady.
«Bıik qamystar ósip ketken, qolaısyz jaǵdaı týdyratyn oryndar bar», - dedi «Ulttyq saraptama ortalyǵy» dırektorynyń orynbasary Jumangeldi Ospanov. «Kaýstık» AQ-nyń aýmaǵynda úlken sý aıyndary men «Qazaqstan Alıýmınııi» AQ-da óndiristik sý jınalyp qalǵan ýchaskeler kezdesedi. Osy jerlerde dezınfektsııa júrgizý qıynǵa soǵady. Byltyr sol aýmaqta qansorǵyshtar kóp bolǵan. Atalǵan kásiporyndardyń ókilderi ákimdikten hat joldaýdy ótindi. Sonyń nátıjesinde monıtorıng jasaıtyn top zertteý júrgiziletin jerlerge esh kedergisiz kire alady. «Dezýs» JShS-niń dırektory Amanjol Ýlıaevtyń aıtýynsha, masalar men shirkeılerdi ýlaý jumystary 23 sáýirde bastalady. Ol úshin tıisti aýa raıy jaǵdaıy qolaıly bolýy tıis ári ǵalymdardyń uıǵarymy kerek.
Eske sala keteıik, oblysta aýmaqty qansorǵyshtardan óńdeýge 602,3 mıllıon teńge bólingen. Bul qarjyǵa masalar men shirkeılerdiń dernásilderine qarsy 199 484 bıologııalyq preparat, Ertis ózeni men 19 950 gektardy áýeden óńdeýge, Pavlodar men Aqsýda 4800 gektardy óńdeýge 4 480 lıtr hımııalyq preparat satyp alynady.
