Pavlodarda mas kúıinde kólik júrgizgen sot oryndaýshylar palatasynyń basshysy jazalandy

PAVLODAR. KAZINFORM — Sot er adamdy kináli dep taýyp, 15 táýlikke ákimshilik qamaý jazasyn taǵaıyndaǵan. Sondaı-aq 7 jyl merzimge júrgizýshi kýáliginen aıyryldy. 

Jeke sot oryndaýshylarynyń respýblıkalyq palatasynyń Pavlodar oblysyndaǵy fılıalynyń basshysy kólikti mas kúıinde júrgizgeni úshin ustalǵan. Bul týraly jergilikti telegram-arnalardyń birinde habarlandy. 

Al «Sot kabıneti» portalynda Pavlodar qalasynyń ákimshilik quqyqbuzýshylyqtar jónindegi mamandandyrylǵan aýdanaralyq sotynyń 21 aqpanda 41 jastaǵy basshyǵa qatysty shyǵarǵan qaýlysy jarııalanǵan.

Qujatqa súıensek, palata fılıalynyń basshysy 21 aqpanǵa qaraǵan túni Pavlodarda kólikti júrgizip kele jatqan kezde toqtatylǵan. Medıtsınalyq kýálandyrý qorytyndysy boıynsha júrgizýshi ortasha deńgeıde mas bolǵan.

— Sot otyrysynda azamat I. ákimshilik quqyqbuzýshylyq jasaǵanyn tolyq moıyndady. Ol sotqa kóp qymyz ishkenin, sodan keıin rólge otyrǵanyn, keıin polıtsııa qyzmetkerleri ustaǵanyn túsindirdi, — delingen sot qaýlysynda.

Er adam Ákimshilik quqyq buzýshylyq týraly Kodekstiń 608-baby 1-bóligi («Mas kúıde kólik quralyn basqarý») boıynsha kináli dep tanylyp, 15 táýlikke ákimshilik qamaý jazasy taǵaıyndaldy. Sondaı-aq, ol 7 jyl merzimge júrgizýshi kýáliginen aıyryldy.

Buǵan deıin Pavlodar oblysynda mas kúıinde kólik júrgizgen sheneýnik jumystan shyǵarylatynyn jazǵanbyz.