Pavlodarda mas kúıinde kólik basqarǵan 267 júrgizýshi ustaldy
ASTANA. KAZINFORM — Jyl basynan beri tártip saqshylary mas kúıinde kólik basqarǵan 267 júrgizýshini anyqtap, zań aıasynda jaýapkershilikke tartqan. Bul týraly Polisia.kz jazdy.
Bul kórsetkish óńir joldarynda baqylaýdyń kúsheıgenin ańǵartady. Óıtkeni mas júrgizýshi — tek óz ómirine ǵana emes, ózgelerdiń de qaýipsizdigine eleýli qater tóndiretin faktor.
— Elimizde mundaı quqyqbuzýshylyq úshin jaza qatańdatylǵanyna qaramastan, ıaǵnı 7 jyl merzimge júrgizýshi kýáliginen aıyrý jáne 15 táýlikke ákimshilik qamaýǵa alý sharalary qarastyrylǵanymen, pavlodarlyq polıtseıler kún saıyn orta eseppen 6-ǵa deıin mas júrgizýshini anyqtap otyr, — delingen habarlamada.
Máselen, kezekti reıd barysynda patrýldik polıtsııa ekıpajy aldymen Toyota Carina markaly avtokólikti, keıin kúmándi áreketterine baılanysty LTM kóligin toqtatty. Atalǵan kólikter jol boıymen senimsiz qozǵalyp, qaýipti manevrler jasaǵan. Qujattardy tekserý kezinde ınspektorlar júrgizýshilerden masańdyq belgilerin baıqady. Medıtsınalyq kýálandyrý olardyń alkogoldik mas kúıinde bolǵanyn rastady.
Sonymen qatar Pavlodar aýdanynda mas kúıinde mototsıkl basqarǵan taǵy bir júrgizýshi anyqtaldy. Atalǵan quqyqbuzýshylyqtar boıynsha barlyq júrgizýshiler ákimshilik jaýapkershilikke tartylyp, is materıaldary sotqa joldandy. Kólik quraldary arnaıy aıyp turaǵyna qoıyldy.
Pavlodar qalasy polıtsııa basqarmasynyń patrýldik polıtsııa batalonynyń komandıri Azamat Qalıaqparovtyń aıtýynsha, mas kúıinde kólik basqarý — jaı ǵana quqyqbuzýshylyq emes, adam ómirine tikeleı qaýip tóndiretin aýyr áreket.
– Árbir júrgizýshi rólge otyrmas buryn óz áreketiniń saldaryn tereń túsinýi tıis. Zań talaptaryn bile tura buzý – jaýapsyzdyqtyń kórinisi. Mundaı áreketterdiń sońy kóbine qaıǵyly jaǵdaılarǵa ákeledi. Bizdiń basty maqsatymyz – joldarda qaýipsizdik mádenıetin qalyptastyryp, tártipti kúsheıtý, – dedi ol.
Tártip saqshylary aldaǵy ýaqytta da profılaktıkalyq jumystardy jalǵastyryp, azamattardy jol qozǵalysy erejelerin qatań saqtaýǵa shaqyrady.
Buǵan deıin Qazaqstanda mas kúıde kólik júrgizgenderdi tekserý tártibi jańartylǵanyn jazdyq.
