Pavlodarda mas kúıde ári kýáliksiz kólik júrgizgen jasóspirim ustaldy
PAVLODAR. KAZINFORM – Pavlodar qalasynda BMW kóligin mas kúıinde jáne júrgizýshi kýáliginsiz aıdaǵan jasóspirim ustaldy. Bul týraly Pavlodar oblystyq polıtsııa departamenti habarlady.
Departamenttiń málimetine súıensek, dostarymen birge saıran salyp júrgen jasóspirimdi tártip saqshylary qala kóshelerin patrýldeý kezinde qolǵa túsirgen.
Quqyq qorǵaý organdary anyqtaǵandaı, ol kólikti ata-anasynan alǵan. Tekserý barysynda onyń júrgizýshi kýáligi joq ekeni jáne alkogoldik mas kúıde bolǵany belgili boldy.
— Kámeletke tolmaǵanǵa qatysty ákimshilik materıal toltyryldy. Sonymen qatar onyń zańdy ókili de jaýapkershilikke tartyldy, — dedi Pavlodar oblysy PD qoǵamdyq qaýipsizdik basqarmasynyń bastyǵy Azamat Kúrkebaev.
Buǵan deıin elimizde júrgizýshilerdiń mas kúıin tekserý erejelerine ózgerister engizý josparlanyp otyrǵany habarlanǵan. Atap aıtqanda, medıtsınalyq kýálandyrý júrgizý tártibin naqtylaý jáne adamnyń jaǵdaıyn baǵalaýdyń dáldigi men tolyqtyǵyn arttyrý usynylyp otyr.
Eske sala keteıik, jyl basynan beri Jambyl oblysy aýmaǵynda 2000-nan astam jasóspirim polıtsııaǵa jetkizilgen.