Pavlodarda Mánshúk Mámetova paıdalanǵan samaýyr saqtalyp tur
PAVLODAR. KAZINFORM - Áskerı dańq mýzeıinde Mánshúk Mámetovanyń jez samaýyry saqtalyp tur. Ony «Maıdan joly» izdestirý jasaǵynyń músheleri Nevel qalasynan alyp kelgen.
Potanın atyndaǵy tarıhı-ólketaný mýzeıiniń qyzmetkeri Jeńisbek Qadyrulynyń aıtýynsha, jádiger 2014 jyly tapsyrylǵan. Ony «Maıdan joly» izdestirý jasaǵynyń múshesi, qoǵam belsendisi Jumabek Qamzın Nevelden arnaıy alyp kelgen.
— Sol jyldary Reseıdiń Pskov oblysy Nevel qalasyna ekspedıtsııa uıymdastyryldy. Jasaq músheleri qazaq jaýyngerleriniń erlik jasaǵan jerlerin aralap, belgisiz jaýyngerlerdiń jerlengen zırattaryn izdestirdi. Reseılik izdestirýshiler Mánshúk Mámetova paıdalanǵan samaýyrdyń tabylǵany týraly aıtqan eken. Sodan Jumabek aǵamyz ony attaı qalap surap alady da bizdiń mýzeıge ákelip tapsyrdy. 2022 jyly qazaqtyń batyr qyzynyń týǵanyna 100 jyl tolýyna oraı mýzeıde mektep oqýshylary men stýdentterdiń, qala qonaqtarynyń qatysýmen eske alý keshteri ótti. Onda bul jádiger jóninde keńinen áńgimelenip, qaharmannyń ómirinen derekter aıtyldy. Samaýrynǵa qatysty tyń málimetterdi jınadyq. Dańqty pýlemetshi qyz paıdalanǵan jádiger búginde mýzeıden óziniń laıyqty ornyn tapty, - deıdi ol.
Mánshúk Mámetova Ekinshi dúnıejúzilik soǵysta Nevel túbinde 1943 jyly erlikpen qaza tapqany tarıhtan belgili. Maıdanda júrip keńes áskeriniń 300 myń jaýyngeri, sonyń ishinde áıelderdiń 86-sy Batyr ataǵyn alǵan. Onyń ekeýi qazaq qyzy bolatyn. Urpaq baqyty, ult bolashaǵy úshin jan bergen apalarymyzdyń erligi osyndaı jádigerler arqyly el esinde jańǵyra bermek.
Eske sala keteıik, Pavlodarda «Bokka» — ejelgi arýlardyń áshekeıi saqtalyp tur.