Pavlodarda mansap ortalyǵynyń dırektory sybaılastarymen bıýdjetten 110 mln teńgeden astam qarajat urlaǵan

PAVLODAR. KAZINFORM -Qylmystyq áreketter jalaqyny zańsyz tóleý, elimizdiń ońtústik óńirlerinen qonys aýdarýshylarǵa materıaldyq kómek kórsetý, úshinshi tulǵalarǵa járdemaqy berý arqyly jasalǵan. 

Pavlodar oblysy Jelezın aýdandyq soty Jelezın aýdandyq jumyspen qamtý ortalyǵynyń dırektory men onyń qaramaǵyndaǵy eki qyzmetkerge, sondaı-aq olardyń sybaılasy bolǵan úsh azamatqa qatysty qylmystyq isti qarady. Kináli tulǵalar bıýdjet qarajatyn asa iri mólsherde talan-tarajǵa salý, sondaı-aq alaıaqtyq pen qujattardy qoldan jasaý derekteri boıynsha aıyptaldy.

— 2021 jyldyń qańtar aıynan 2024 jyldyń sáýirine deıingi kezeńde azamat T., Jumyspen qamtý ortalyǵynyń qyzmetkerleri A., S. jáne azamattar A., K., J.-nyń kómektesýimen jalpy somasy 110 332 622 teńge bıýdjet qarajatyn jymqyrǵan. Qylmystyq áreketter jalaqyny zańsyz tóleý, qonys aýdarýǵa materıaldyq kómek kórsetý, úshinshi tulǵalarǵa járdemaqy berý arqyly jasalǵan. Sottalýshylardyń kinási kýálardyń, jábirlenýshilerdiń ókilderiniń, sottalýshylardyń ózderiniń aıǵaqtarymen jáne is materıaldarymen dáleldendi, — dep habarlady oblystyq sottyń baspasóz qyzmetinen.

Sot qylmystyq isti qaraı kelip, T.-ǵa 7 jyl, Jumyspen qamtý ortalyǵynyń qyzmetkeri A.-ǵa 3 jyl bas bostandyǵynan aıyrý jazasyn taǵaıyndady. Ekeýi de ómir boıyna memlekettik qyzmette jumys isteý quqyǵynan aıyryldy. Ózge sottalýshylardyń jazany jeńildetetin mán-jaılary men keltirilgen zııandy óteýleri eskerilip, 2 jyldan 4 jylǵa deıin bas bostandyqtary shekteldi. Olarǵa probatsııalyq baqylaý belgilenip, májbúrli jumysqa tartý jazasy taǵaıyndaldy.

Eske sala keteıik, Shymkenttegi ýnıversıtette asa iri kólemde bıýdjet qarajatyn jymqyrǵandar ustaldy.