Pavlodarda Máńgilik alaýdy qıratqan kúdikti ustaldy
PAVLODAR. KAZINFORM - 39 jastaǵy azamat mas kúıinde Dańq obelıskindegi besjuldyzdy granıt tasyn syndyrǵan. Polıtsııa vandalızm faktisi boıynsha sotqa deıingi tergeý júrgizip jatyr.
Oblys ortalyǵyndaǵy Máńgilik alaýdy áldebireýlerdiń zaqymdap ketkenine qala basshylyǵy nazar aýdaryp, polıtsııaǵa vandaldardy taýyp, jazaǵa tartý kerektigin eskertken. Pavlodarlyq polıtseıler arada bir apta ótkende Dańq obelıskisin búldirgen kúdiktini anyqtaǵanyn habarlady.
«Máńgilik alaýǵa zaqym keltirgen Pavlodar qalasynyń 39 jastaǵy turǵyny ustaldy. Oqıǵa sáýirdiń 10-ynan 11-ine qaraǵan túni shamamen saǵat 4-te bolǵan. Er adam mas kúıde bolǵan. Polıtsııa vandalızm faktisi boıynsha sotqa deıingi tergeý júrgizip jatyr", - dep habarlady Pavlodar oblysy polıtsııa departamentiniń baspasóz qyzmeti.
Zańnama boıynsha vandalızmge jol bergenderge 160 aılyq eseptik kórsetkishke deıingi mólsherde aıyppul salý qarastyrylǵan. Odan bólek sol mólsherde túzeý jumystaryna, qoǵamdyq jumystarǵa 160 saǵatqa deıingi merzimge tartý nemese 40 táýlikke deıingi merzimge qamaýǵa alý kózdelgen.
Qalanyń kommýnaldyq qyzmetteri Máńgilik alaýdyń zaqymdalǵan bóligin búginde qalpyna keltirip qoıdy.
