Pavlodarda mal urlyǵymen aınalysqan úsh qylmystyq toptyń joly kesildi
ASTANA. QazAqparat - Pavlodar oblysynyń quqyq qorǵaýshylary sátti ótkizilgen jedel-izdestirý is-sharalarynyń nátıjesinde oblys aýmaǵynda mal urlyǵymen aınalysqan, 12 adamnan quralǵan úsh qylmystyq toptyń jolyn kesti. Bul týraly QazAqparat tilshisi Pavlodar oblystyq polıtsııa departamentiniń áleýmettik jelidegi paraqshasyna silteme jasaı otyryp habarlaıdy.
Departamentten habarlanǵandaı, tártip saqshylary 25-40 jas aralyǵyndaǵy 6 adamnan turatyn topty quryqtaǵan. Urylar qylmystyq kásippen sońǵy jyldary Maı aýdanynyń aýmaǵynda aınalysqan. Tergeý barysynda olardyń taǵy 5 faktige qatysy bary anyqtaldy. Jalpy alǵanda olar 74 bas jylqy urlaǵan. Qabyldanǵan sharalardyń arqasynda zańdy mal ıelerine 37 jylqy qaıtarylyp, qalǵandarynyń satylǵan oryndary belgili boldy.
«Sondaı-aq, Baıanaýyl aýdanynda bos mal jaıylymynan 26 bas jylqynyń urlanýyna qatysty 2 kúdikti ustaldy. Zattaı aıǵaq retinde polıtseıler urlanǵan maldyń birnesheýin ıelerine qaıtardy. Qalǵan urlanǵan jylqylardy kúdiktiler Qaraǵandy oblysynda satqan. Barlyq satý oryndary anyqtaldy. Qazirgi ýaqytta kúdiktiler qamaýda otyr. Tergeý jalǵasýda. Sondaı-aq kúdiktilerdiń basqa da qylmystarǵa qatysy bary tekserilýde», - delingen habarlamada.
Polıtseılerdiń kúshimen ustalǵan úshinshi top Aqsý aýdanynda qolǵa túsken. Birneshe ret mal urlaǵan toptyń quramynda 4 adam bolǵan. Tergeý kezinde urylardyń mal urlyǵynyń 11 faktisine qatysy bary dáleldengen. Qazirgi ýaqytta atalǵan toptyń barlyq músheleri sottalǵany habarlanýda.
