Pavlodarda mal tasymalyn baqylaý úshin 10 mobıldi beket qoıyldy
PAVLODAR. KAZINFORM - Óńirde «Mal urlyǵy» jedel-profılaktıkalyq is-sharasy aıasynda reıdtik tekserýler júrgizilip jatyr. Maqsaty – mal urlyǵynyń jolyn kesý, et ónimderiniń zańsyz saýdasyn anyqtaý jáne veterınarııalyq-sanıtarııalyq talaptardyń saqtalýyn baqylaý.
Polıtsııa qyzmetkerleri veterınarııalyq ınspektorlarmen birlesip, saýda oryndaryn, bazarlardy jáne mal men et ónimderin tasymaldaý baǵyttaryn tekserip jatyr.
Reıd barysynda oblystan shyǵatyn tasjoldar men qalaǵa kireberis joldarda 10 mobıldi beket uıymdastyrylǵan. Onda polıtseıler avtokólikterdi toqtatyp, tasymaldanatyn júktiń veterınarııalyq qujattaryn, janýarlardyń qulaq bırkalaryn jáne ettegi veterınarııalyq tańbalardy tekseredi.
- Qazirdiń ózinde veterınarııa salasynda eki zań buzýshylyq anyqtalyp, materıaldar quzyreti boıynsha tıisti organǵa joldandy. Polıtsııa ınspektorlary sharýa qojalyqtarynyń ıelerimen, baqtashylarmen jáne jeke qosalqy sharýashylyq ıelerimen profılaktıkalyq áńgimeler ótkizýd, - deıdi Pavlodar qalasy polıtsııa basqarmasy krımınaldyq polıtsııa bóliminiń bastyǵy Ashat Muqyshev.
Eske sala keteıik, elimizde mal urlyǵy boıynsha 460-qa jýyq kúdikti ustalyp, 3 myńnan astam mal ıelerine qaıtarylǵan.
