Pavlodarda mal qorymy men zırattarǵa jaıylǵan qarǵyn sý Ertiske aǵyp jatqan joq
PAVLODAR. KAZINFORM — Pavlodarlyq turǵyndardyń messenjerlerine Ertistiń joǵary jaǵyndaǵy zırattar men mal qorymdaryn sý basyp, odan ári ózenge quıylyp jatqany týraly aqparat tarap ketti. Ári onyń saldarynan óńirde ishek aýrýlary kóbeıgeni, krannan aqqan sýdy kemi 10 mınýt qaınatyp ishý kerektigi kórsetilgen.
Óńirlik sanıtarııalyq-epıdemıologııalyq baqylaý departamenti bul aqparattyń jalǵan ekenin málimdedi.
Mekeme mamandary aýyzsýmen qamtý nysandaryndaǵy tirshilik náriniń sapasyn baqylaýda ustap otyrmyz dep sendirdi.
«Sý tasqyny kezeńinde týyndaýy yqtımal sanıtarııalyq-epıdemıologııalyq jaǵdaılardyń aldyn alý maqsatynda jáne halyqtyń densaýlyǵyna tónetin qaýipti tómendetý úshin sanıtarııalyq-epıdemıologııalyq baqylaý departamentiniń aýmaqtyq basqarmalary tarapynan aýyzsýmen jabdyqtaý obektilerine monıtorıng kúsheıtildi. Sáýir aıynyń basynan aýyz sýmen jabdyqtaý nysandarynan 552 sý synamasy mıkrobıologııalyq jáne sanıtarlyq-hımııalyq kórsetkishteri boıynsha zertteldi, sáıkes kelmeıtin synamalar anyqtalǵan joq.Paıdalanýshy uıymdar men jergilikti atqarýshy organdarǵa halyqqa jetkiziletin aýyz sýdyń sapasyna baqylaýdy kúsheıtý jóninde, sondaı-aq óndiristik baqylaýdy júzege asyrý týraly eskertildi. 8 sáýirdegi jaǵdaı boıynsha oblystaǵy sýmen jabdyqtaý obektileri shtattyq rejımde jumys istep tur. Jiti ishek ınfektsııasy boıynsha epıdemıologııalyq jaǵdaı turaqty. Sý basý saldaryna baılanysty jiti ishek ınfektsııalarynyń ósimi baıqalǵan joq» dep habarlady departamentten.
Deıturǵanmen mekeme mamandary ishek ınfektsııalarynyń, «A» gepatıtiniń jáne ózge de juqpaly aýrýlardyń aldyn alý maqsatynda jeke gıgıenany saqtaýdy, aýyzsýdy kepildendirilgen kózderden alýdy jáne qaınatylǵan nemese bótelkedegi sýdy paıdalanýdy usyndy.
Eske sala keteıik, Pavlodar oblysynyń prokýratýrasy aımaqta jalpy sany 38 jeke úıdi sý basqanyn málimdedi.
Jalaýly aýylynda jarııalanǵan tótenshe jaǵdaı rejımi alynyp tastaldy.
